Ralring : Covid 19 thuthang diklo ruangah Minung 800 luan an thi zo

Covid 19 dokhamdaan thuthang diklo ruangah le mipi in Online conspiracy theories an zum ruangah Covid 19 suak hnu thla 3 sungah mipum 800 luan an thi tiah mithiam researcher pawl ih suah mi American Journal of Tropical Medicine and Hygiene ah an tarlang.

Covid 19 suakpek hrawng ah nat kham daanding thuthang diklo pawl cu social media ah an thlah ciamco ih cuvek thuthang diklo theithiamlo mipi cun a tak in an tuah ngaingai ruangah thla 3 sungih sizung thlengtu mipum 5800 an kim tiah cuih hmuhsuahnak ah an tarlang.

Cuvek thuthang diklo pawl cu “infodemic” ti`n World Health Organization in hmin a pek ih coronavirus hnakin a karhzai caksawn tiah WHO cun a sim.

Coronavirus thawn pehpar mi thuthang diklo pawl cu “khasuanrang tamzet einak le vitamin phunphun ei nak in nat a dam, Caw zuun in nathrik a that thei, innsung thianfainak hmanrua in-nak in nathrik a that” tivek thuthang diklo phunphun zum in, a takin an tuah ngaingai ruangih damlo/thi an tam.

Thuthang diklo pawl cu social media ah an thlah nasa tukih April le June karlak lawngah Facebook le Instagram ih an hlawn suak mi misinformation 7 million a kim tiah Facebook khalin a tarlang.

Korea ram khal ah thlacam thlawsuah pek mi tidai nih nathrik a kham, a damter ti`n kohhran pakhat in zumnak a nei ih cuih tidai bal an in ruangah minung 100 lenglo an damlo phah thluh.

5G network nih Covid 19 a suakter timi conspiracy theories cu social media ah an share ciamco ruangah arak zumtu pawl in buainak an tuah ih 5G tower khal an ur-kang phah thluh.

Tukhal ah mifim Bill Gate in minung taksa control dingin micro chip tel mi vaccine a tawlrel timi thuthang a leng ruangah Covid – 19 khamsi a suak khalle ka dawt lo ding titu an tam zo tiah theih a si.

Hitivek thuthang diklo tam zet cu social media ah siarcawk lo in le hlawn cawk loding khawp in an thlah ringring ruangah mipi lam in zum thluh lo dingin le community zawng khalih ṭanlak cio dingin WHO cun forhfialnak a nei a si.

Leave a Reply

Your email address will not be published. Required fields are marked *