President Donald Trump hin Ziang vek Rawl ei in ziang a In ṭheu?

2019 kum thok lam ih White House doctor sim vek a si le Pu Trump hi 239 pounds a rit ih feet 6 inches 3 in a sang. Feet 6 le inches 3 sang mi hrang ih 239 pounds rit cu Centers for Disease Control and Prevention in thau luan ti`n rikhiah mi a si nan White House doctor cun a hrisel zet a ti.

Rawl a duh mi le a ei ṭheu mi pawl zoh ahcun nauhak aa a bang zet ih a ei-in mi pawl a hrisel lo zet. Asinan President pathum hrang ih special doctor rak ṭuan dahtu Er. Ronny Jackson cun “an ciikuang a ṭha hrimhirm. Tuhlan kum 20 sung ih a ei-in mi pawl hi a hrisel mi hlir rak si bang seh la cu kum 200 tiang hman a dam men thei” a ti.

Ice-cream a duh zet timi thu ah “a hrisel dingin exercies lak ter kan tum nan kan duh vek in a cangsuak thei lo. A Hrisel mi thil ei ding kan duh sak ruangah a duh zet mi ice cream khal a hmuh thei lo nak ding ah ka thup deuh ih aalu rawtbek a ei mi sungah cauliflower kan phum thup ṭheu” tiah Dr Ronny Jackson in The New York Times hnen ah a sim.

Thawhhlam ei a uar lo
“Acangthei a si le thawhhlam ei ka hrial. Cuvekcaan le suncaw ka ei ṭheu nan zaanriah ei hi ka ti ropi bik” ti`n Pu Trump cun 2016 ah Fox News hnen ah a sim.

Thawhhlam a ei le voksa pherh (bacon) le arti kaphnih kio, cereal lole McDonald McMuffin a ei. Coffee le lakphak a in lo ih Amah cun “ka duh bik cu bacon medium le arti kaphnih kio hi a si” a ti.

Suncaw ei a uar lem lo
A ei khal le thawhhlam a ei lo caan ah a ei tam. Cuih caan khal ah sasen rialdip mi meatloaf sandwich a ei ih a duh bik mi khal a si.

Zaanriah a ei pi bik
Pu Trump Campaign manager rak si dah tu Corey Lewandowski cabu ngan mi vek a si le Pu Trump cu campaign a nei lai ah nazi 12-16 sung hrawng ziang hman ei lo in a um ṭheu ti a si ih zaanriah ah Big Macs 2, Filet-O-Fish sanwiches 2 le chocolate shake fate a in ti a si.

Burger a uar zet ih White House a luah veten a mah hrang liolio ah Burger tuahnak a ret ter. Sasen suan/kio hmin a uar zet ih KFC khal a duh zet. Asinan midanglam hrimhrim ti cu Sasen a ei le ketchup thawn a hmeh ih Sasen le KFC lole arsa kio cu naamte le thirhai ṭek (fork) thawn a ei ṭheu.

President a si bang in White House ih rawleicaan a tam ih rawl ei sawm mi an nei le mikhual ai ih danglam deuh mi ei le in a hmang. Rawlpuar hnu ih ice cream an ei khal le midang hnak ih tamsawn a ret aw ṭheu ti a si.

Fastfood a uar zet ih a bikin McDonald a uar hlei ah cuih hmun ah a ei tam. Michael Wolff ngan mi Fire and Fury: Inside the Trump White House cabu ahcun “Tur ei-in ngah ding a ṭih zet. McDonald a uar zet nak khal thil dang si lo. A hmun ih a feh ding timi zo hman in an thei lo ih ei le in bawlnak ih an hman mi cu a him zet mi thilri a si hlei ah tuah cia ṭhepṭhi (premade) an si ruang bikah a si” ti`n ngan khum a si.

Rittheih a tham lo ih Zu khal a in lo nan nikhat ah Diet cokes bur 12 hrawng a in a si.

Leave a Reply

Your email address will not be published. Required fields are marked *