Pathain ih sak fial mi Chicken Church Thuanthu Tawi

Indonesia, Central Java tupi sungih Ar biakinn (Gereja Ayam lole Chicken Church) cu, kum tin, ram dangdang ihsin vehvaitu a nei ringring.

Indonesia, Java tikulh, Magelang kiang ih ummi a siih, hih hmun kiangkap ih um pawl cun Gereja Ayam lole Chicken Church ti`n an ko. Asinan, hih innpi saktu Daniel Alamsjah cun Chicken khal a si lo ih Church khal a si lo a ti.
Innpi saktu Daniel Alamsjah cu hih hmun ihsin a hlatnak peng 342, Jakarta ih hnaṭuan a siih a mang ah Pathian in a sak fial ruangih sak mi si in a rel.

“Christian ka si ruangah kan mai` Pathian biaknakding lawng ih sak mi ah in ruat. A si lo. Ka saknak hmun, inn pian hmang zaten amah Pathian in, in fial vek ciah in Pathian zumtu hmuahhmuah ih thlacamnak dingah ka sak mi a si” tiah kum 67 upa Daniel Alamsjah in Jakarta Globe media hnen ah a rak sim dah.

Kum 1988, zaan thlacam a neih hnu ah mumang deuh vekin vur vekih var mi Peleng vate a zuang lai a hmu ih Tlang par ah a cawl. Vate a to veten aw thuum zetin thlacamnak biakinn sakaw tiah fial nak aw a thei. Cuih ṭum ihsin lar nak a hmu mi cu a mitthlam ah a lang ringring thok.

vehvaitu a nei tam hlan ahcu a ṭhing riapriap

German chemical company BASF ih manager a siih Ramadan holiday ah cawlh laktu, a hnaṭuan mi pakhat a kir saal lo ruangah a umnak khua Magelang lam ah hawl dingin a pawk suak. An khua ahcun a va hmu ih a hnaṭuantu cun an kir hlan ah Rhema Hill Tlang par ihsin voikhat te, Ni suah a zoh duh thu a sim ih a nih khal in a ello.

Zing a hung kim ih Tlang par an kaai tikah manglam vekin a thei mi vur vekih var vate a hmunak hmun a si timi a thei suak. Daniel cun “Ka mangbang tuk rori. Mumang vekih ka hmu mi Tlang rori a si. Lar awnak hmu beisei in cuih hmun ah Bible ka siar ih zaanvar thla ka cam. Thla ka cam lai ah Isaiah 2:2 ka thinglung sungah a suak thutthi. Ruat loin ka um tum khalle a hlo thei lo.”

A sunglam khal a hlan ahcu laktlak a um lo

“Zing ka tho ih khua ka cuan cu Tlang pakua ih kulh mi hmun ah ka um. Cuveten ka thinlung sungih suak mi Bible bungcang thawn a kaih awk thluh timi ka hmu suak” tiah Daniel Alamsjah cun a sim. Cuih ṭum ah biakinn sak nakding 5,000 square meters kau, hmunram cu Rp. 3,500,000 (cu lai ah $2,000 hrawng) in a lei ih innpi cu 1992 kum ah a sak thok.

Hnaṭuan tuding minung 30 a sawr ih an mah pawl cun, “a thok ahcu laraw nakah ka hmu a timi vate vek ciah in kan sak. Nan, a thinghlim mi bang dingin Lal lukhuh kan khumter hnu in, mi pawl in Ar ah an ruat ih Chicken Church ti`n an ko thawk” an ti.

A dunglam umdan

Innpi an sak ṭheh hlan, 2000 kum in paisa remcanglo ruangah an sak pehzom thei nawn lo ih cuih ṭum ihsin hih hmun zoh dingih a ratu hmuahhmuah paisa malte an khong thok.

Innpi vehvaitu an mal zet ih an sak pehzom thei nawn lo nak kum 15 rei hnu ah hih innpi thuhla cu The Daily Mail le the Huffington Post in an ngan ih, cuih hnu in leitlun ah a hmin a thang. Zarhkhat ah vehvaitu minung 2000 hrawng an nei ringring ih, 2016 ih suah mi film hminthang “Into the Inferno” khal ah an tilang.

Innpi saktu Daniel Alamsjah
an rem ṭhat hnu ahcu a mawi zet

A hmin a thang thok hnu in a sung ih lut man Rp. 10,000 an ngen ih paisa an ngah mi pawl in a sunglam an rem vivo. Tu ahcu thlacam dingin leitlun hmun tinkim ih um biaknak dangdang pawl in thlacam dingin an pan ṭheu ih nupa neiawnak khal ah an hmang.

Tourist pawl ih ca tar nak Wall Of Hope

Daniel Alamsjah cun, “himi innpi ka rak buaipi thok lai ah mi aa na si in ti. Cuvek caan khalah Bible cang ka hmusuah mi ka ruat ṭheu ih kei mah ten kan hmenaw. Ka fa le pawl khal ka par ah an thin heng zet. Nan, kei cun ‘kei mah khuakhan mi a si lo. Pathain ih fial mi a si’ ka ti ringring hai. kum 30 rei hnu ah vehvaitu kan nei thok ih leitlun hmun hla zet khal in thlacam ding ah an ra pan. ka hlawh tlingmi par ah ka fa le pawl khal, ka tuah mi an u pat zo. Ka thin hna a ngam tuk rori si. Tu ahcu mi aa in rak ti dahtu hih hmun kiangkap ih um pawl khal in Biakinn lar dan an thei suak hlei ah hmunhlat in vehvai dingih ratu tourists pawl in cawlh nak ah an hmang ih khaw mi pawl in pumcawmawnak tingah an hmang thei zo a si” a ti.

Leave a Reply

Your email address will not be published. Required fields are marked *

error: hahahahahaha !!