Mi theih mal zet mi Kedam Dunglam Sang “High Heel” suahkehdan

Tui san ih Kedam dunglam sang bun mipa cu hnihsuakza ih ruah a si nan Kedam dunglam sang suahkehnak kan zawt sal ahcun mipa in an rak bun hmaisabik timi kan hmu thei.

Rang to phah ih raldotu Persian ralkap pawl in an bun hmaisabik ti`n historians pawl cun an sim ih 9 Century hrawng ihsin an rak bun thok zo ti a si.

Rang totu ih ke retnak pal nak ah a remcang hlei ah Rang par in Thaal an sai tik ah taksa ruangpi cang ciamcolo dingin Rang par Ke pal nak ah rem zetin a rak awk thei ruangah an hmang ṭangkai zet.

1599 kum ah Parsian ram palai pawl in raldo ṭanpi bawmnak dil dingin Europe ram ah an feh ih cuih ṭum in Europe ram ih milian pawl cun ceiawknak ah hmang in an rak bun cawng thok.

Cutin Europe ram ih um milian pawl cun mineinung an sinak langternak ah le mipa niam deuh pawl in sang deuh ih lang thei dingin ceiawknak ah an rak hmang thok. (Etymologists ṭhenkhat cun “wealthy” timi ṭongfang cu “well heeled” timi in a suak thok an ti.)

Ziangah, Nunau in Kedam dunglam sang an bun?
Hlan san ahcun nunau hi hmuhniam an rak siih Mipa thawn bangran kan si timi langternak ah Europe ram ih nunau pawl cun kum 1600 hnu in Kedamsang an bun thok.

Ziangah, Mipa in Kedam dunglam sang an bun nawn lo?
Nunau pawl in Mipa thawn bangran kan si ti`n Kedam dunlam sang an bun mi cu Mipa in kan bang aw lo timi langternak ah 18th Century hrawng in Kedam dunglam sang an bun duh nawn lo.

Cutin Kedam dunglam sang cu sankhat hnu sankhat, a lar, larlo ti`n tikcucaan zir in an bun thleithlak vivo nan hlawhhlang pawl lak ah cun mipa cakhiarnak a suak ter cuang timi zumnak thawn an bun ringring.

Kedam dunglam sang cu 1980 kum hrawng ihsin a lar thok sal lala ih tui ni tiang a lar lan ta a si.

ref:reddit,wiki

Leave a Reply

Your email address will not be published. Required fields are marked *