Leitlun Tlang sangbik Mount Everest cu Feet 2 in a Ṭhang

Himalayas Tlang tluan ih um Mount Everest cu China le Nepal ram ih mithaim pawl in caan reizet zirzoinak nei in a saanlam an tah hnu ah tuhlan ai in feet 2 hrawng in a ṭhang/sang tiah December thla sung ah an phuang.

Vur tah telin asaanlam feet 8,848.86 m (29,032 ft) a si mi Mount Everest cu Nepal le Tibet (China ramsung) ramri ih um Leitlun Tlang sangbik a siih Indian subcontinent tumlam an tah ṭum ah (Great Trigonometrical Survey) Leitlun ih Tlang sangbik asinak an hmusuak mi a si.

An hmuhsuak kum cekci hi a phunphun in an rel ih rinsantlak The Guardian thuthang cun hitin a ngan.

Great Trigonometrical Survey hotu George Everest upat sunloihnak ah Leitlun ih Tlang sangbik cu 1856 kum ah Mount Everest tiah a hmin an pek. 1852 kum ah Great Trigonometrical Survey team ih mathematician Radhanath Sikhdar in zirzoinak an nei mi ih hmuhsuakmi cu Leitlun ih Tlang sangbik a siding a zum thu a rak phuang ih kum tawkmawi rei hnu ah Leitlun ih Tlang sangbik a si tiah an run namhnget leh.

Tlangpi cu Tibet pawl in “Chomolungma” (Goddess Mother of the World lole Goddess of the Valley) tiah an ko. Nepal ram cun Sanskrit ṭong in “Sagarmatha” (Peak of Heaven) tiah an ko.

Hmin rak nei cia cingin British pawl in Peak XV tiah hmin an pek ih 1865 kum ah Tlang saanlam an tah ṭum ih survey hotu British mi Sir George Everest upat sunlawihnak ah Leitlun Tlang sangbik cu Mount Everest tiah a hmin an thleng.

Mi ram a si tlun ah ram neitu ih kohdan Hmin nei cia cingin Mount Everest tiih Tlang hmin an pek cu hmin neitu Sir George Everest cun zahthlakzet a si a ti.

Mount Everest thuhla theihṭha

1. Leitlun Tlang sangbik a si lo
Tipithuanthum ri in tah ahcun Leitlun Tlang sangbik a si ko. Asinan, Tlang tonak hram rorin tah a si le Hawaii ih Mauna Kea Tlangpi a sang sawn. Tipithuanthum ri in feet 13,796 a sang ih, Tipi in feet 19,700 hrawng a khuh. A tawhram in feet 33,500 a si ih Mount Everest hnakin peng 1 zikten a sang sawn.

Mauna Kea Tlangpi

2. Vur a tlak ringring
A sanlam feet 17,400 hrawng cin in kum pumpihlum deuh thaw in Vur a tlak. Tlang kai pawl cun cuih ri an thlen cun mitkherh le thuamhnaw hlum hruk tengteng a ṭul. Boruak a sia tuk ih a sat bik cu -20°C (-4°F) hrawng a si.

3. Tlang par kai dingah USD $ 30,000 hrawng a ṭul
Tlang kai duh cun khualtlawng suksonak, lamziin khihhmuhtu, training, hmanrua pawl hrang thawn US $ 30,000 tal cemliam a ṭul.

4. Minung 300 hrawng an thi zo
Vur min, Hmun sang boruaksia natnak (altitude sickness), khaamhrap ih tlak tvk ruangah Tlang par kai minung 300 hrawng an thi zo. Mitamsawn cu ṭum lam ah an thi. Khaamhrap, nikhuasia/boruaksia le harsatnak phunphun ruangah thihhloh tongpang cun an ruak an phur aw lo. Tlang par ah an tanta.

5. 8,000 Meters sangnak hmun ri cu Death Zone tiah an ko
Oxygen mal, Tlang kai pawl caurau cuang, a dai tuk ruangah meters 8,000 (26,247) sangnak ri cu Death Zone tiah an ko. Hih hmun ri hrawng ihsin mithi an tam thok.

6. Mithi an mal vivo
Santhar a si vekin fimthiamnak a sang vivo ih Tlang kainak hmanrua ṭha an hman thok ruangah le nikhua tahnak in boruak umdan ding a sim dik vivo ruangah Tlang par kai mithi an mal vivo.

7. Tlang kai ah zarh 10 hrawng an rei
Tlang sang a si ruangah nikhua boruak umdan a dang vivo. Boruak le tisa/taksa milaw dingin zir phah vivo a ṭul ih nikhua ṭha hngak phah thawn Tlang par kai tikah zarh 10 hrawng rei a ṭul.

8. Mount Everest par ih siatralnak rapthlakbik
2014 : Nepal ram ih 7.8 magnitude thacak Linghninnak ruangah Mount Everest ih Vurpi a ciim ih Tlang kai le lamziim khihhmuhtu minung 16 an thi. Minung 61 in hliamhma an tuar ih, Cuih ṭum cu Mount Everest ih siatralnak rapthlakbik tiah Everest Tlang thuanthubu ah an ngan khum.

9. Tlang ziim kaisuak hmaisabiktu
Mount Everest ahhin Tlang tamzet a um ih a saanbiknak hmun kaisuak hmaisabik cu New Zealand rammi Edmund Hillary le Lamziin hmuhtu Tenzing Norgay an si. (Kum 1953)

New Zealand rammi Edmund Hillary le Lamziin hmuhtu Tenzing Norgay

10. A Ṭhan a tawp lo
Mount Everest cu kum 60 millon hrawng tar ih ruah mi a si ih geological zawng cun a nauhak/no tuk lai. Indian le Eurasian tectonic plate tulaw ruangah kum khat ah 4mm hrawng a ṭhang.

Zohṭhimmi:Wiki,TheGuardian,Reddit,MEfact

Leave a Reply

Your email address will not be published. Required fields are marked *

error: hahahahahaha !!