Kutdawh Danglam “Manusia Silver a.k.a Silver Man”

Indonesia ram ah kutdawh tamzet an um ih cu pawl lakih danglam hleice pawl cu “Manusia Silver, Silver Men” tiih an kawh mi kutdawh pawl an si.

Thil kan tuah piang in danglam le a hlawk cuang mi kan duh vekin kutdawh pawl khal, mi tuah kel lomi danglam cuang, paisa ngahtam le mi ih ngaihsak cuang danding an hawl ve ih, hih silver men tiih an kawh mi pawl cun mipi lakih langsar cuang le ngaihsak hlawh cuang mi si dingin an taksa ah rawng hnih in khawsung ah an vak ih kut an dawh.

Silver rawng thuhaw in lamziin ah milem vekih ding ṭheu “street performer” pawl cawng in an tuahaw vemi a siih a tuah hmaisabiktu pawl cu an hlawh tling zet. An taksa ih an thuhawmi silver rawng cun mimit a lak zetih hmunhla deuh ih hmutu pawl khal an umnak kiang rori ah va pan in paisa an va pek ṭheu. Curuangah an hlawh tling zet. Paisa khal an laklut tamzet.

An danglamtuk ruangah nitin thuthang suahmi caphek tiangah an telh. An hmin a thang vivo ih kutdawh dang pawl khal in a hlawk zia an thei vivo ih an cawngaw vivo. Khua khat hnu khua khat an cawngaw vivo ih, tuahcu an tamtuk luan lala ih mipi le tourist pawl in ziang ah an siar nawn lo.

Kandung baite ah kum 4 mi nauhak te cu anmah vekin silver rawng an hnih ih kut an dawtter ruangah buainak an tong. Cuih nauhakte cu lamziinpi le traffic zaamnak ih mortor karlak ah lut in paisa a dil vivo, Cutiih paisa dil ih vak, nauhak cu video an zuk ih online ah an thlah.

“Nauhak a si ih zianghman theilo a si hlei ah motor karlak ah bahkhawnnak in a thi pang thei si” tiin mipi sawiselnak an tong ihsin khawsung ih silva rawng thuhaw kutdawh vak pawl cu palik in an kaai thok. Tu khalah silver rawng thuhaw ih kutdawh vak sukso cu an um nan, an mal tuk thlang. Khawsung ih vak an um le palik in an kai ringring thlang a si.

Leave a Reply

Your email address will not be published. Required fields are marked *