Kum nauhak te`n US Navy SEALs, Doctor, NASA astronaut Ṭuantu Johnathan Kim

Hnaṭuan ṭha pakhat nei ding hman a harsa lai ah South Korea mi Jonathan Kim cun Navy SEALs sinak, Dr sinak le Astronaut sinak 3 rori cu kum 36 a kim hlan ah a ṭuan ṭheh.

Kim hnaṭuan mivek pakhat ṭuan thei ding hman, a ollo zetmi a siih a nih cun kum 35 a si ah cuih hnaṭuan pawl cu a ṭuan ṭheh a si. A thuanthu hin mi thinlung a hiip zet ih a hnaṭuan mi le ziangvek minung a si timi kan zoh tlang hnik pei uh.

A hnaṭuan pakhatnak cu US Navy SEALs ralkap a si. SEALs timi cu Sea-Air-Land tinak a si ih tipi, vansang, leipar ti`n thumkop ralkap a si. SEALs ih tling thei ding cun riruang ṭha, harhdam zetmi si a ṭul ih an traning daan khal a hartuk ruangah mi menmen an ṭuan thei lo.

A pahnih nakah Dr. a si. Leitlun tlawng hminthang Harvard Medical School rori ih ṭheh suak mi a si.

A pathumnak cu NASA astronaut ah a tling. Leitlun hnaṭuan ngah harbik an ti mi lak ah NASA astronaut hnaṭuan a tel ve ih hih hnaṭuannak ih tling thei ding cun mifim pittawp si a ṭul. Kum tinten minung thawng teel ih dil ṭheu mi hnaṭuan a si nan a ngah tu cu, tuni tiang zaa vukvel hrawng lawng an um. Cutiih zaran ngah thei lo mi hnaṭuan pathum rori cu kum 36 a kim ah a ṭuan ṭheh a si.

Jonathan Thuanthu Tawi
South Korea ram mi a siih a nu le pa cu 1980 kum ah US ram ah an vaai. Kim cu 1984 kum ah a piang ih a pai` zu dawr tuah phah le a nu tlawng sayamah ṭuan phah in a naupa thawn ṭhang lian khat mi an si.

California, Santa Monica High School ah tlawng a kaai ih “ṭihhrut le mah le mah zumawnak nei lo zet ka si” ti`n interview an tuah nak ah a rak sim dah.

A tet lai ihsin Navy SEALs ralkap ṭuan thei dingin tumtahnak a nei cia ih taksa ṭha, harhdammi si dingin khal a zuam ringring. A thluak a ṭha zet ih fimzirnak lam khal ah mithiambik dinhmun ih ding thei ringringtu a si. Tidai leuh khal a peih zet ih Polo sport khal a ngaina zet.

Suakthuan Tlawng a ṭheh hnu, kum 16 a kim ah United States Naval Special Warfare Command ah a lut. NSCW lut thei ding cun ṭuarfei, hrisel zet a ṭul ih tlawng a rak kaai lai ih a rak lek nasatuk cia ruangah olsam ten a tling thei.

Teimaknak a nei ruangah le a thinlung a pacang tuk ruangah a lamtluan a tluang vivo ih SEAL 3 (special team) dinhmun in lamhruaitu, mina enkoltu, hmaisabik ih raldotu tvp khal ah tel thei in mission 100 luan a feh ve a si.

Ralkap a ṭuan lai ah tlawng a kaai phah ih 2012 ah mathematics in B.A degree a ngah. Degree a ngah hnu in Harvard Medical Shcool ah sii lam fimthiamnak a zir ih 2016 ah Dr sinak degree a ngah. Massachusetts General Hospital le Brigham and Women Hospital ah internship dinhmun in Dr. a ṭuan ih, Cutluk ih hnaṭuan ngah cing in nupi a nei ih fa 3 a nei.

Harvard Medical Shcool tlawng a kaai lai ah Dr. le astronaut si cih mi tlawng saya pakhat an nei ih, cuih saya sinakvek nei dingin zuamduhnak thinlung a nei lala ruangah NASA astronaut sidingin a dil ve.

Cuih ṭum ah NASA astronaut sinak diltu mipum thawng 20 zikte an kim. Cupawl lak ihsin a dotdot ten an hril vivo ih, a fim, thiam tlun ah teimak thinlung a nei ruangah a hlawhtling ih minung thawng 20 zikte lakih an hril mi, minung 12 lak ah a tel ve.

NASA ih a hnaṭuannak khal ah lamtluang in a sinak a sang vivo ih tu ahcun Artemis program tiih an ko mi Thlapi sung lut ding pawl lak ah a tel ve a si.

ref:reddit,wiki

Leave a Reply

Your email address will not be published. Required fields are marked *

error: hahahahahaha !!