Delhi in Meithal hmangin Thlisia A Do Thok

Leitlun ram borhbah, thli thianglo, minung hriselnak hrang ih ṭihnungbik ram pawl lakih telve India cun thlisia semfainak meithal (anti-smog gun) a hmang thok.

Khawtlaang mipi hriselnak ngaihtuah in New Delhi Municipal Council in a tawlrel mi a siih, meithal cu Delhi khawlaifang, Connaught Place, Central Park ah July 13 ni ah an bun thokmi a si.

An tumtah vekin hna a ṭuan thei ngai maw ngailo, zoh lawk dingin an bun mi a siih New Delhi Municipal Council Chairman Dharmendra cun “khawtlaang harhdam hrisel ding duhsan ih kan tawlrel mi a si. Kan zum vekin hna a ṭuan thei ngaingai maw timi zoh lawk dingin kan bun mi a si. A ṭangkaai ngaingai a si le hmun dang khal ah kan bun bet ding” tiin a sim.

Meithal cu Rs 13 lakh (2,37,28,698.27 Myanmar Kyat) hrawng cem in an tuah mi a siih 27,000 – 37,000 square metres (sqm) tiat hrawng kau in hna a ṭuan thei.

NDMC chairman Dharmendra cun “boruak ih thlisia pawl tifainak hrangih tuah mi a si. Meithal in tidai (atomised water) a kap suak ding. Sii thawn cawkrawi mi tidai cu ṭekdarhṭheh dingin high-speed fan in a seem ding. Cuih tidai pawl cun thli lakih hmuhthamlo hnawmbal pawl a zuuk thluh ding” tiin meithal ih hnaṭuan danding a tawi zawngin a sim.

Meithal ih suak mi tidai cun minung hrang ih ṭihnung mi thlisia level PM 10 ihsin PM 2.5 hrawng ah a ṭumter an beisei. An tumtah vekin hna a ṭuan theingai a si le Delhi khawsung hmun dang pawl khalah bun bet an tum.

2018 kum ih an hman mi tidai kapnak

“Kan tumtah vekih hna a ṭuan theingai a si le India Gate, Rajpath, Metro tlangleng colhnak le thlisia tamcuangnak hmun pawl ah kan bun bet ding” tiin Delhi Municipal Council Chairman Dharmendra cun a simbet.

Kum 2018 khal ah India cozahpi in Delhi khawsung ih thlisia tambiknak Anand Vihar veng ah tidai kapnak meithal a rak hmang dah. Asinan tidai pangai in kapmi a si ruangah ṭhathnemnak a suahpi tuklo. Nan, tuih suak thar meithal cu a hlan ih an hman mi meithal hnakin a ṭangkai ding an zum sawn a si.

ref:IT,Wiki

Leave a Reply

Your email address will not be published. Required fields are marked *

error: hahahahahaha !!