Turkey Linghnin thawn pehpar in Acozah in kaikhihmi mipum 184 nei zo
February 6 ah linghninnak rapthlak in a nuai mi Turkey ram ah inn min le inn siat besia 173,000 lenglo a um ih, cumi thu thawn pehpar in acozah in kaikhih tummi mipum 600 luan a nei.
Cu pawl cu mipi tampi umnak inn tum pipi sak dingih contract latu, inn neitu lole inn kilkhawitu manager tipawl an si ih inn sak mi le inn enkol ṭhiṭha lo ruangah linghnin ah inn tampi a cim nak san a si ti`n Turkey cozah in mawh a puh hai.
Turkey, Justice Minister Bekir Bozdag cun “inn cim tampi zoh ciangin a cim nak san zirzoi a si hnu ah inn sak contract latu lole inn kilkhawitu pawl in mawhphurnak tampi an nei ti kan hmu suak.”
“Thusut lole kaih ṭul mi mipum 612 an um ih cumi lak ihsin Thawngthlak sungmi mipum 184 an um. Thuhla zirzoi vivo a si dingih mawhnak a neitu cu duun daan vekin hrem an si ding” tiah a ti.
Kaikhih zomi ah linghnin hramṭannak naivai ih um khua pakhat mayor Okkes Kavak a telve ih a nih cu khuasung inn pawl an him le him lo zohfelnak a nei lo ti`n an kai mi a si.
February 6, Turkey-Syria linghnih ah mithi 50,000 luan an um ih, Turkey disaster management agency tarlang mivek a si le February 6, magnitude 7.8 thacak linghninnak a suak hnu, tui ni tiang ah linghninnak (aftershocks) voi 9,470 a um bet zo ti a si ih, AFAD General Manager Orhan Tatar cun kum 2 sung tal aftershocks a um bet ding an zum thu a rel a si.
