Raltlan umnak inn 3000 zik a kaang mi cu Nawh Kaang hrim mi a rak si ziar
March 5 ah Bangladesh ram, leitlun refugees camp tumbik Cox Bazar ah kaangmei a suak ih Rohingya raltlan umnak inn 2800 lenglo le Siizung, Tlawnginn tipawl a kaang fai ih raltlan mipum 15,000 hrawng umnak nei lo ah an cang.
Inn kaang thok dan rinhleh a um hlei ah daan pangai vekin inn kaang dan zirzoi a si tikah ramkulh cozah ṭuanvonei pawl in khaang hrim mi a si ti an hmusuak.
Mei kaang thok dan zirzoi dingah committee dinsuah a si ih, hruaitu lubik, district government official Abu Sufian cun “Khaang hrim mi rori a si” a ti.
“Timlam cia in nawh kaang mi a si. A kaang hlan nikhat duh ah hmunram cuhaw in mi bur dangdang kahdo awknak a um. Cun, mei kaang thok hi voilekhat ah amalbik hmun 5 rori ah a kaang tlang. Cule, mei phal lo dingin khamtu an um” ti`n mit rori thawn hmutu mipum 150 lenglo relmi sirhsan in Reuters hnen ah a sim.
Rohingya raltlan mipum million khat luan umnak Cox bazar cu a tum tuk ih district dangdang um in phunhnam zawngin a hranhran ten pawlkom le misual tampi an um. Cupawl lal cuhaw ah khat le khat inn an urkaang sakawk mi a si tiah amahcun a rel bet hrih ih, zoi phunhnam cangvaihnak a si ti cu a rel tel lo.
Kan dung 2021 March thla khalah Rohingya raltlan umnak inn 10,000 lenglo a kaang ih cuih ṭum ah mithi 15 an um.
Tu ṭum innkaang ahcun mithi an um lo nan raltlan harsa pawl hrang a thupi zetmi Siizung, Tlawnginn, Biakinn le Khawtlang pawlkom inn tampi a kaang tel.
Bangladesh, Cox bazar refugees camp ih um Rohingya raltlan tamsawn cu Kawlram ihsi tlansuak raltlan pawl an si ih, harsatnak ruangah inn ṭha sak thei lo in rua le palastic thawn sak mi inn ih um an tam ruangah mei kaang caan reilote ah inn tampi a kaang a si.
