Nepal Vanzam tlak lai fang, a sung lam ihsin zukmi FB Live video a puut darh

January 15 ih Nepal Vanzam a tlak lai fang, a sunglam ihsin zuk mi video tawi cu internet cahmai ah thlahdarh a si ih atufang ah a lar zet.

Video zuktu hi Sonu Jaiswal tiih koh mi mipa a si ih, Vanzam a ṭum tum thok ihsin Facebook ah Live video a thlah tiah Nepal le India media pawl ah tarlang a si. Tanglam ah VIDEO zoh.

Vanzam tlak mi cu Yeti Airlines vanzam a si ih hnaṭuantu le a mawngtu telin a totu zaten minung 72 an si.

Nepal khawpi Kathmandu ihsin zam suak a si ih a ṭum nak ding Pokhara khua International Airport a thlen hlan ah rin lo pin a tlak mi a si. Mithi 60 luan an um thu nemhnget a si zo ih miruak hawl le sartu pawl cu khua a thim zo ruangah an cawl hrih.

Nepal aviation official thusuah dan ah vanzam ihsin pehtlaihnak an dong netabik cu zinglam 10:50 (0505 GMT) ah a si ih “cuhnu ah a tla cih” tiah official in an phuang.

Vanzam tlak lai hmutu Khum Bahadur Chhetri in “a tlak hnu minute rei lo te ah a hmun ka thleng cih ih Vanzam hrek cu Tlangpar ah, a hrek cu hawrkuam ah a um.”

“A tla hlan ah inn par ihsin ka rak zoh. A zam rero lai ah keh le vorh ah a sawiaw ciamco ih cutin hawrkuam lam ah a pan cih. Vanzam totu lak ih mipahnih cu khawmi pawl in Siizung ah an hruai” tiah Reuters hnen ah a sim.

Leitlunhuap Vanzam hnungzultu Flightradar24 tarlang dan ah Vanzam tlakmi cu kum 15 hrawng ih upa a si ih a hlun zo mi biakpawhnak le signal don nak pawl vuah mi a si hlei ah cuih ceet ih data pawl cu rintlak lo an si tiah a tarlang.

Nepal ram ah vanzam cangsualnak a tam thei zet hlei ah vanzam, ceet thilri an hmang mi pawl a hlun tuk ih, European Union tla cun mipi humven nakah ti`n an airport pawl ah kum 2013 ihsin thok Nepal airline ṭum an kham.

January 15, Nepal vanzam tlakmi ah naute 3, nauhak 3, India mi 5, Russia 4, Iris 1, South Korea mi 2, Australia 1, French 1 le Argentina ram mi 1 tipawl an tel ih, Vanzam a tlak nak san cu ni 45 sungah zirzoisuak kan tum ding tiah Nepal finance minister, Bishnu Paudel in reporter hnen ah a sim a si.

Leave a Reply

Your email address will not be published.