Linghnin mithi tam lai ah Mi Thil Fir ih rak vaktawi an tam – VIDEO
Turkey le Syria ram linghnin ah mithi Thawngteel um in miruak le mibawm hnaṭuan pawl an phar an zuang lai ah mi thil fir ih vak tawi an rak tam ve.
Mipi lungkuai thinbang in vangsang an lam lai cu caan ṭha ah lakin inn cim mi lak ihsin mi thil laksaktu siseh, dawr boh tivek tiang an um.
Linghnih roh cuang nak Hatay le Karamanaras khua pawl ah thil fir le hriam hrei thazaang hmangin mi thil lak sak hmang an tam thu, report a tam ih mibawm hnaṭuan pawl mawṭaw sung ih thil ṭha ruktu tivek tiang an um.
Thir fir lai video siseh rukru ṭhenkhat khawmi pawl in an thawi lai video online ah hmuh ding a tam ih, Turkey cozahpi rori khal cuvek pawl ruangah thin bang zetin rampi president rori in zangfah lainatawknak thinlung pu cio dingin mipi forhfialnak a nei phah.
Turkey president Recep Tayyip Erdoğan cun “Dawr thil an fir, thil ṭha lak duh ah mibawm hnaṭuan pawl kut an thlak. Ṭhenkhat cu kaihkhih an si zo ih a tanglai pawl khal kaih ngah an si cun mawhphurhnak tumpi lak terin napin hrem an si ding” tiah a ti.
Ramsung party pakhat hotu khalin “Sui dawr cim mi lak ihsin lung man khung lak duh ah minung thazang thawn huat thei lo cin cu bomb thawn an puah. Thil ṭha lak duh ah mibawm hnaṭuan pawl meithal thawn tin in an duh nak hmun an lai tir.”
“Mah khawp tawk ding ei le in lawng siloin hnipuan sinfen mankhung zuarnak dawr siseh, HDTV, Phone le electronic thil phunkim tivek tiang an la. Cuvek pawl cu ngai thiam theih an si lo. Ram uktu pawl hna an ṭuan ṭha tawk lo” tiah rampi President soisel phah in media hnen ah a rel ve.
February 6, Turkey-Syria linghnin ah mithi 28000 an luan zo ih hriam tuar 80,000 luan an um zo. Mithi hi zatzat an um nak san cu Linghnin tha a cak ruangah khal a si nan, inn ṭiaṭai lo a tam ruang khalah a si ti`n zumnak a um. Curuangah inn sak hnaṭuan company le contract latu telin kaihkhihmi le kaih ding ih warrants suahmi mipum 130 luan an um a si.
