Kum kim lo Nauhak kut ah Riit Theih SiiVai an kai

Mizaan, March 16 ah Kawlram ihsin phurluh ṭheumi riit sii vek, sappia bawm sungih retmi heroin gram 67.41 cu Bungbangla, Aizawl District ah SpecialNarcoticsPS team in an kai.

Tuhlan khalah riit sii phurtu an kai tampi zo nan tuṭum cu kum kim lo nauhak kut ah an kai mi a si ruangah soiselawknak a na tuk cuang.

Riit sii phurtu an kai tikah palik le FB group ṭhenkhat ah a khaatkhaat in tarlang ṭheu a si nan tu ṭum cu Mizo media picang pawl ah pholang mi hmuh ding a tam ih “kan ram le mizo mino hrangah kan ṭangrual a ṭul” an ti cio.

Mizo Palik khalin a hranten thuthang an suah ve ih “Riit theih Phur/Zuar thup pawl lakah kum kim lo nauhak tiang cangvaihter a si thlang tikah kan ram le khawtlang hrangah kan zaten kan do tlang a ṭul thlang” tiah an tarlang ve.

Riit sii phurtu kum kim lo nauhak cu Champhai, Vengthar ih um mi si in a relaw ih mipa maw nunau a si timi cu palik in an phuang tel lo.