Bangkok ah Kawlram mi Naam thawn dawt that aw
Thailand, Bangkok Platinum shopping mall ih hnaṭuan Kawlram mi lakah ti aw thiam lo nak a um ih Phyu Mar Aung, kum 34, cu tuni March 9 ah naam thawn an dawt that tiah theih a si.
A dawttu hi Platinum shopping mall ih hnaṭuanve Kawlram mi Thet Lin Oo a si ti`n report a um ih, Mibawm hnaṭuan pawl in naam dawt tuar Phyu Mar Aung cu an tuamhlawm nan an buai hnu minute 30 hrawngah a nunnak a cem.
Thailand Palik lam cun hnaṭuan ṭha lo report awknak a um ruangah thinheng in naam thawn a dawt mi a si ti`n media hnen ah an simthei ih “inch 3 naamte thawn a awm, a zaang le a kut pawl ah voi 5 a dawt” tiah an sim.
Platinum shopping mall ih hnaṭuanve Kawlrammi pakhat khalin “hna a ṭuan ṭha lo. Phone lawnglawng a tham ti`n boss hnen heek nak a um. Cumi thinheng ah naam thawn a dawt mi a si” tiah a rel ve.
Hnaṭuanpi dawt thattu Thet Lin Oo cu Shopping mall ihsin a tlanhlo tum nan security hnaṭuan pawl in an kai man ih palik kut ah an ap.
Atu ah Thet Lin Oo cu Phaya Thai Police Station ah hren khih in a um ih, ṭuanvoneitu pawl in mithat thubuai tuah sakin a ṭul dan vekin hmalaknak an nei vivo tum tiah theih a si.
