ZRO/ZRA cu Min Aung Hlaing lamṭang Ralhraang an si ti`n official in an phuang

Chinram ralhraang do dan olsam dingin mipi humtu hriamkai komkhawm mi Chinland Joint Defense Committee (CJDC) cun Zomi Revolution Organization/Zomi Revolution Army (Eastern Command) cu SAC thawn hnaṭuantlang ralhraang an si ti`n official in an phuang.

Chinram ih tuah mi voithumnak CJDC meeting ah thu an rel cat ih “Zomi Revolution Organization/Zomi Revolution Army (Eastern Command) in CJDC sungtel do in le Chin mipi hrem in an that”.

“Cuhleiah Ralhraang SAC ralkap thawn hna an ṭuan tlang mi cu fumfe zetin khihhmuhding kan nei. ZRO/ZRA (Eastern Command) cu Tedim le Tonzaang mipi aiawhtu an si lo. Curuangah ZRO/ZRA (Eastern Command) cu Ralhraang pawlkom an si ti`n kan pom” tiah CJDC in thu an suah ih Chinramhuap ah Tender dilnak siseh cangvaihnak tuah lo dingin an kham a si.

CJDC voithumnak meeting cu victoria sakhaan ah April 7 ihsin 12 tiang an nei ih hriamkai pawlkom 18 pawl ih palai 31 telin meeting kaitu zaten mipum 65 an si.