Voikhatnak Chin National Organization conference ih relcatmi Thuhlapi 5
Chin National Organization ih voikhatnak conference cu 2022 April 20 ihsin 23 tiang, ni 3 sung tuah a si ih buaibainak umloten an ṭheh suak thei tiah theih a si.
Headquarters umnak Chinram, Camp Rihli ah hlunghlai zetin an tuah ih CNO/CNDF dinpitu ramsung ramleng upa tamzet sawm telin, mipum zaten 200 hrawng an si.
Lairelnak ah CNO/CNDF kaihruainak hnuai ih um department dangdang in kumkhat pumhlum cangvaihnak report peknak le sumsaw thuhla report peknak an nei ih, a liamcia kumkhat sung hnaṭuan zomi thlirsaalnak le hmailam kekar danding thuhla pawl khal an rel cih.
Chin National Organization (CNO) ih Constitutions & By-Laws, TOR le Policy pawl zohtlang in nemhngetnak khal nei cih a si ih, thuhlapi an relcat mi pawl cu a hnuailam bangtukin an si.
1. Dictatorship system a hram ihsin ṭhiatbal dingin le Federal Democracy ngah theinak ding hrangih a ṭulmi Mipi mahtei’ ukawknak cu CNO/CNDF ram sungah a rang thei bikih ṭuansuah theidaan policy le khuakhannak pawl khiahfelnak.
2. Chinram kilhimnak le Humhimnak hrangah Chin National Defense Force thacak sinsin ding in CJDC ih a telmi peng, hmunram tinih dinmi kilhimnak pawlkom dang pawl thawn kom-aw in hmual a neimi ṭuantlangnak pawl tuah vivo ding.
3. CNO/CNDF dinhmun in Ṭhalpau Dothlengnak ih a thupi zetmi dinhmun ih telmi CDMers pawl thawn Chinram dinsuahnak ah hnget zetih kutkai aw in ralhraang uknak kumrei dinghnget thei dingih a bawmtu a simi Non-CDMer pawl cu nasa ten mawhphurnak pe ding.
4. CNO/CNDF ram sungih Tender dilnak le hnatuannak pawl cu kan kham ih hnatuan an um asile CNO/CNDF ih a neihmi daan vekin cawhkuannak le daantatnak nei ding.
5. Ralhrang uknak le dictatorship zaten cemral dingih dothleng caan sungah ralhraang pawl thawn ṭuantlangtu zovek khal siseh, ziangvek pawlkom khal siseh, ralhraang pawl thawn bangran ih retin mawhphurhnak le daantatnak tuah ding” tipawl cu Chin National Organization voikhatnak conference ah an relcat tiah theih a si.
Siarbet : CNO/CNDF Thuken le Dinpimi
▪️Chin National Organization (CNO) cu Chin Miphun huap Ramkhel Pawlkom (Political Organization) a si.
▪️Chin National Defense Force (CNDF) cu CNO tumtahmi pawl ṭuansuaktu, Uknak diklo dothlengtu le Chin miphun kilhimtu Hriamkaibu a si.
▪️CNO/CNDF cu Chin Ram le Chin Miphun hrang lawng si loin Rampi Federal Democracy a ngah tiang a ṭuantu ding a si.
▪️Kan Rampi dothlengnak hrangah NUG le CRPH thawn kutkai-aw in ṭuantlangtu pawlkom a si.
▪️Ramsung Ramhrin Miphun Hriamkaibu, Ethnic Armed Organizations (EAOs) pawl thawn ṭuantlangtu ding a si.
▪️Chin Ramkulh sung um hriamkaibu pawl a simi: CNF, ZRO(E), CDF le PDF pawl thawn Chin Ram le Chin Miphun hrang ah ṭuantlangtu a si.
▪️CNO/CNDF cu Chin Ram le Chin Miphun ṭhatnak ding hrang a ṭuantu, a zalenmi pawlkom a si.
