Pu No Than Kap ih “Mino hrang Thurawn 10”

Ram hruaitu le hotu sive duh men si lo, si tum taktak MINO hnenah pek ka duh mi thurawn 10 – Pu No Than Kap

1. Thuanthu, a hleice in Chinram le miphun thuanthu dik, theih fiang tum hmaisa aw.

2. Chin miphun a dam hrih lo ti theih fiang tum hmaisa aw.

3. Experience nei tam hnen ihsin zirsuah mi nei tum aw. [Cuvek mifim thawn minute 5 thurel tlang cu mi zaran thawn kum tam umtlang hnakin a hlawk deuh ti thei aw.

4. Dungthluntu rinum si tum hmaisa aw; Mi rinum lo hotu tling an um dah lo. (Minung zokhal, thih ni tiang zir ding nei kan si thluh ti thei awla, ka thei zo, ka tlingtlak zo, timi lungput nei loin zir rero duhnak lungput nei sawn aw.

5. Na hnak ih ramhna ṭuan taktak mi hmaisapawl thawn hnaṭuan tlang thiam aw la, anmah do le eltainak ihsin nehnak co tum hlah. [An palh tiin na ruat mi na sim hman ah anmah zuam le huat ruangah si hlah seh.

6. Mah hnak ih kum upa zah le upat thiam aw. [Anih cu na hnakih dinhmun niam le thiam lo a si le zah le upatnak langter sinsin aw.

7. Faknak ruangah uangaw in rinsan aw tuk pang hlah. [A tak ah thil a danglam duh zet ti thei aw.]*Tui ni ih “Hosana! Hosanna ..!” tin lo cawisangtu khi thaisun ah “Kheng bet uh! Kheng that uh..!” tin lo auhtu ah an cang thei ti thei aw.

8. Na duhnak lawng fehpi tum tuk hlah; A ṭha vek nan ṭih a nung. Thurawn tamtuk khal la hlah; a hnawk thei.

9. Ziangkim a ṭha zawng ih hmu thiam le mi ngaidam thei si tum aw.

10. Pathian siar lo, Ram le miphun hmaisa bik ah ret aw. [Na lungsung taktak ah, nangmah le thil dang hnakin ram le miphun hmaisa deuh ah na ret thei lo ding asile, ramhna ṭuan hrim hrim hlah – beidawnnak le mualphonak in a lo thlun cih thei.

Leave a Reply

Your email address will not be published.