Na theih tengteng ṭul mi Martial Law um tu dan – Judge Salai Thawngpi

Martial Law timi cu bikhiahnak um lo thuneihnak in uknak ti sehla a fiang ding. Martial Law hi mipi (civil) uknak kha duh vekin hna a ṭuan thei nawn lo, asilole mipi uknak a cawl tikih suahmi uknak phunkhat a si.

Martial Law thuneihnak kaitu cu Ralkap an si ih anmai thuthu in hna an ṭuan thei. Martial Law phuan a si tikah daan kha san a tlai nawn loih Martial Law hmangtu thuthu in hnaṭuan thei a si thlang. Curuangah Martial Law uknak cu duh lo um zet uknak a sinak a si.

Feb 2, 2023 ah Martial Law phuan a si ih Chinram peng 7 a tel ve. (Mindat cu 2021 ah rak phuan zo a si) Chinram sung ah Paletwa lawng Martial Law phuan a si lo. Martial Law an phuan hnu ah ṭhulh sal an duh a si ahcun ram daihnak le daan vekin hnatuan thei a si maw timi an zoh ih daihnak le daan vekin hnatuan thei a si ahcun Martial Law ṭhulh sal a si.

1989 ah Chinram Tongzaang, Thantlang, Kanpelet le Matupi ih phuanmi Martial Law an rak ṭhulhsalnak zoh tikah ram daihnak a um hnu ah ṭhulh mi a si. No. 2/1989 Martial Law an suahmi hnakin No.12/2023 Martial Law an suahmi hi a nem deuh ti theih a si.

2023 Martial Law an suahmi vek a si ahcun hman rero lai mi daan pawl an hmang tum ve. Amahbelte thuneihnak an duhduh hman thei an sinak cu khamsak theitu a um cuang lo ding. 1989 ih an suahmi Martial Law ahcun Order (thusuahnak) an tuahmi hmuahhmuah Ralkap Thuṭhennak in thuṭhensak ding ti a si. 2023 Martial law suahmi ah cuvek an telh lo. Cule 1989 ih an suahmi ah kum 3 hnakih mal lo hnaṭuan thawngthlak hi a niam bik thuthennak a si. 2023 Martial Law ahcun hman rero lai mi daan timi ṭongfang a hmang. Himi hi danglamnak a ummi cu a si.

Uknak thu ah a dotdot uknak hnaṭuannak pawl laireltu cu Ralkap an si thlang ding. Humhimnak thu, khawtlang thu, pursum leilawnnak thu le khualtlawng thilphurhtu khal Ralkap in an tawlrel ding. Thu an suahmi hmuahhmuah thlun ṭul ding dinhmun a si.

Thuṭhennak thu khal sualmawhnak thu pawl ah hman rero lai mi thuṭhen zung an hmang thei, asilole ralkap thuṭhen zung an din thei. Ralkap thuṭhen zung an din ih thu an ṭhen a si ahcun tlunlam zung ah lungkim loin kainak thu (appeal) a um nawn lo ding. An thuthennak kha a cem cih. Amahbelte thihnak mawhpeknak thu ah SCA Chairman ih lungkim hngetternak a um a ṭul. Cule kum bikhiah um lo thawngthlak thu ahcun DAING-HMU lole Regional Commander ih hngetternak a ṭul.

Curuangah thuṭhennak thu hi peng dinhmun in ralkap thuṭhen zung a din ding asilole peng pahnih kom tivek khalin a din thei. DAING-HMU in thuṭhen zung dinnak thu a suah leh ding dinhmun si. Amah in thuṭhen zung kai in thu a ṭhen lo ding. Sualmawhnak phun 23 kha Ralkap thuṭhen zung dinmi in thu an then ding ti a si ruangah thuthen zung hi tuan le tlai ih din ding lawng a tang. A din ding ti a fiang.

Hrekkhat in zaan suahvah lo ding thu kha CrPC S.144 thu hmang in a suah vek ah kan ruat. Martial Law ah daan hmang tahrat in thu an suah lo. Anmah ih rem an tidan vekih suah an si. Curuangah CrPC S.144 hman a ṭul lo. Amahbelte ca an suahmi hrekkhat zoh tikah hmang laimi daan vekin timi tongfang an hman ruangah minung 5 lole pa 5 tlun umkhawm lo ding tivek hi Penal Code vekin thu ṭhen ding dinhmun a si.

Martial Law ah ralkap in duhduh in mi an that thei tivek tla sim le rel a si. Hihi a pittawp in kan ruahmi men a si ti theih a si. Amahbelte Martial Law phuan sung ih an tuahmi hmuahhmuah tlun ah thuneitu daan an neih lo ruangah ziangvek khalin mawh pek thei an si lo. Himi dinhmun ruangah duhduh in mi an that thei timi tiang ruahmi a si tlangpi. An thuthu in hnatuan theinak pek an si tikah ziangvek lam khalah ralrin cu a ṭul.

Salai Thawngpi (Ramthlo)