Mizoram cozah in Chin raltlan hrang duh um lo zet Daan thar a tuah
Chin raltlan tampi umnak Mizoram ah daan lo in a luttu siseh, cozah theihpitnak tel lo in raltlan dinhmun ih umtu pawl hrang ah Birth certificate le Death certificate tuah sak lo dingin Mizo cozah in Daan thar a tuah.
India cozah cazin lak dan ah Mizoram ah Myanmar rammi mipum 40,000 hrawng an um ti a si ih, cu pawl hrangah naute suak thar certificate tuah lai mi siseh Thih le hloh tongtu hrang certificate tuah sak lai mi tivek khal tuah pehzom lo dingin pengṭhen pawl ah ramkulh cozah in thuthannak a nei zo tiah theih a si.
Hih thu thawn pehpar in interdepartmental coordination committee pawl cu 2022 October thla ah meeting to in Daan thar an ser ih Chief minister Zoramthanga hnen ihsin siannak an ngah hnu ah January 31 ihsin cuih daan thar cu an ti nung mi a si.
Tuhlan ahcun Mizoram ih piang naute zate cu India ram ih piang naute a si ti theitheihnak caken suah sak a si nan atui Daan thar an suah hnu cun cuih pianvo cu nei theih nawn lo ding dinhmun vek khi a si.
Asinan Mizoram ih um Chin raltlan hrang hnaṭuantu upa pakhat cun FOM hnen ah hitin a sim. “Central cozah in Mizoram ah Kawlram raltlan lut lo dingin hmalaknak an nei mi pawl cu kan thei cio ko ding.”
“Cun, central cozah in Mizo cozah hnen ah raltlan thawn pehparin thu nor mi tampi a nei ve ding. Cui ruangah a hmin in hih Daan an tuah mi a si thei”.
“Kan ram a buai hnu ah Mizo cozah in ziangvekcin tiang Myanmar/Chin raltlan hrang hmalaknak a nei ti cu kan thei cio ding. Thisenzom unau dinhmun in in zohkhen ih kan dil mi ziangtinkim cu theithiamnak thawn in tuah sak ringring thotho” tiah a ti.
