Dr. Run Bik rel mi Falam Bazaar thar sak dan ding ….
Falam ih bazaar innpi ding hi kan helhkam cio ko. Kum 2022 kum tawp tiang kha ramkulh siipin state municipal in Falam bazaar sak dingin an dilnan Naypidaw a cozahpi in a sen lo. 2023 kum tawp kan hngak la la hrih ding ih, tuṭum ah acozah in a sen cuang lo cun India embassy ah kan dil thlang a ṭul ding.
A sak man ding hi kum 2022 ih tuat nak ah Ks.ting 14000 a ṭul. Cui ruangah Indian embassy khal in an ti thei lo khal a si thei. India ih ti thei le thei lo ding cu kum 1 sungah thei a theih ding. India khal ih a ti thei cuang lo ding cun mahte kan sak a ṭul ding. Mahte ti tikah kan Falam milian pawl an cang a ṭul.
Kan dung kum 2 lai ah milian pakhat in Falam bazaar sak hnu a thuah 4 nak le thuah 5 nak hmun in pek ding ahcun bazaar sak nak ah Ks.ting 4000 ka suah thei ding a ti. Ks.ting 4000 cun kan ngam lo ding ih milian pawl in Ks. ting 8000 an suah thei ding ahcun kan ngam ding.
Si le ziang tin kan ti ke. Cumi daih lo mi cu bazaar dawr nei pawl hnen ihsin Ks. ting 2000 cu kan hmu ding. Falam khuasung ih mipi le kawhhran pawl in kum 1 sungah Ks. ting 2000 cu kan thawh thei ding. Falam peng mipi hnen in Ks.ting 1000 cu a suak ding.
Surbung vanzam ṭum hmun le Vaar hydro hrang ah mipi pawl ih zarh khat tlanghna an rak ṭuan mi kha atui kum 50 tlun pawl cun an thei lai ko ding. CBANA le ram thuamnak ih um kan Falam mi pawl hnen in Ks.ting 1000 cu kan hmu thei ding. Cule Chin ram cozah siipin hnen in kum 2 sungah Ks.ting 3000 cu kan hmu ding. Town hall hrang teh Sipin in Ks.ting 3500 a suah a si si.
Cuiruangah kan ṭanh hlan ihsin rin um in kan teimak cun tui hnu kum 3 kum 4 ah bazaar inn thar pi cu kan sak thei tho tho ko ding.
