Dr. Rodinga – MAH in remdaihnak thurel dingin Tlangpar hriamkai pawl a sawm nak san

Atufang ramsung ramleng ngaihsak hlawh zet thuthang pakhat cu Ralhraangbawi Min Aung Hlaing in remdaihnak thureltlang dingin Tlangpar hriamkai hruaitu pawl a sawm mi thu hi a si ih, hih thuthawn pehparin kan Chin upa rinsantlak Dr. Rodinga (Burmese American Community Institute Chairman) cun a hmuh dan a rel ve.

“Kahdaihnak a um hnu ah Democracy, Federal rampi a um ding hi kan saduhthat a si. Kahdaihnak ti cu a ṭongfang zawng cun a ṭhabikmi a si.”

“Asinan, atuih Min Aung Hlaing sawmnak cu ka zum thei lo lawlaw. Ziangah ti le thilung thiang an nei lo mi hmuh ding a um ciang ruangah a si.”

“Atu hi, Min Aung Hlaing in kan rampi cu ziin thum in a fehpi. Pakhatnak cu ‘control’ a si. Yangon, Maydalay, Naypyidaw tivek kha ralkap le palik tampi thawn control in a fehpi. Pahnihnak cu ‘contain’ a si. Tlangpar hriamkai pawl kha remdaihnak kan tuah ding ti`n a lem. An mah kap lo dingin ‘contain’ a tuah. Pathumnak cu ‘crush’ a tuah, a rial thluh, a kap thluh. Sagaing ah, Chin ram ah, Kachin ah kahdonak a tuah ih an inn, an Lo a ur thluh. Inn an ur mi hi 9000 a um. An kah that mi hi 2000 leng an si zo. Khatin ziin 3 in a fehpi. Cumi a fehpi mi le tubai ih remdaihnak kan tuah ding a timi cu a kalhaw thluh”.

“Rinlopin remdaihnak kan tuah ding a ti nak san cu phun 3 in ka hmu. Pakhatnak cu Kachin, Karen tipawl Tlangpar hriamkai pawl kha CNF telin PDF, CDF pawl hrambunawknakbik a si. Cupawlthawn remdaihnak kan tuah ding a ti nak san cu PDF, CDF tipawl kha thazang cak hlah hai seh a ti nak a si. Ṭhenṭhek humreek a tum.”

“Pahnihnak cu, atu hi hmai a nor tum thlang. Remdaihnak tuah dingin ka sawm nan an ra duh lo. Remdaihnak an duh lo. Curuangah ka kap hai a si ti`n phuhlam hrang laziin a sial.”

“Pathumnak cu, leitlunpi hmai ah keimah MAH le SAC cozah cu remdaihnak a duh taktakmi kan si. Remdaihnak tuah dingin kei mah rori in cabuai ah to tlang dingin ka sawm ti`n leitlun mipi a hmuh duh ruangah a si. Curuangah remdaihnak thureltlang a timi cu sullam zianghman a nei lo”.

“Cun, KNU, KIA tipawl cu atutiang feh an tum lo. Kan feh ding titu cu RCSS, PNLO tivek pawlkom fate pawl lawng an si ih, remdaihnak thureltlang an timi cu sullam zianghman a nei lo rori a si” ti`n Dr. Rodinga cun RPV thawn online hmaton thusutnak an nei nakah a rel a si.