Ciamciam in timlam hnu ah Thantlang palik sakhaan lak suak
Chin ralkap a si mi CNA le CDF ralkap cun Thantlang khuasung palik sakhaan luhcilh in, tuzing February 9 ah an lak suak ngah thu theih a si.
February 1 ah ralkap le palik ralhraang 6 kaih ngah an si ih, Chin ralkap pawl in an hnen ihsin sakhaan um dan siseh an duty nak hmun pawl le thu poimawh ziangmawcin an thei ding zum a si.
February 3 ah ralhraang umnak hmun fuh zet in zingzaan bomb an puah hnawh ih, a zarhkhat nakah palik sakhaan luhcilh bet in an lak suak mi a si.
February 8 zaan thim hnu ah cangvai thok a si ih February 9 zingralkai ah palik sakhaan an lak suak. Sakhaan ah ralhraang 40 hrawng an um ding zum a si ih, ralhraang 4 kap that in a dang pawl cu an tlanhlo thluh tiah an sim.
“Atu ah palik sakhaan le GAD zungpi kan luhcilh khawsuak zo ih Thantlang khuasung ahcun ralkap pawl umnak hmun tatkung lawng a tang. Doawknak ah kan ralkap pakhat in nunnak a hlan ih hriam tuar pakhat a um” tiah CNA/F ṭuanvonei Salai HtetNi in a rel.
Chin ralkap in ralhraang sakhaan ihsin meithal ṭha 40 lenglo an lak sak thei ih cumi lak ah drone kahnak tivek tiang a tel.
Doawknak hnungzul in ralhraang ralkap lam in raldo vanzam thawn Thantlang khuasung le a kiangkap pawl ah bomb nasaten an thlak ve tiah theih a si.
