Chin raltlan pawl ṭulsambikmi hrangah Mizoram Minister an bia
Kawlram buainak ruangah raltlan dinhmun in Mizoram ih beutu Chin raltlan hrangah tuhlan ihsin pawlkom zawngin siseh bulbak khalin bawm thei danding tawlrel sak rero an si ih, atu khalah US ihsin Mizoram lam tlawngtu Chin mino pawl cun Kawlram raltlan hrang hmalaknak nei in Mizoram Health Minister Dr. R.Lalthangliana an tong tiah theih a si.
Mizoram Minister tongnak ih telvetu Justin Thang cun “kan vahvaih nakah kum upa tamzet nih an simmi cu, Mizoram cozah in umnak ding hmun in tawlrel sak, ei-ding in-ding in pek, kan lung a awituk.”
“Asina’n, nat caan ih sibawi hmuh awnak le ṭul caan ih siivai laak hruak ding a um lo tikah har kan tituk an ti. Cuhleiah numi tampi cu nu daan nei an si ringring tikah an ṭulsammi tampi daih aw loin an um theu.”
“Cuih thuhla cu Mizoram Health Minister Dr. R.Lalthangliana hnen ah kan sim thei ih, khawkhan hmalaknak nei lohli kan tum ding in ti ih kan lungawi zet” tiah a ti.
Cuhleiah an ton mi Minister cu harhdamnak lam lawng siloin fimzirnak lam khal kai cihtu a si ih, raltlan pawl tlawng ṭhate`n kai theinak dingah nor vivo kan zuam ding ti`n Justin Thang cun a rel bet hrih ih, thu feh tluang thei dingin mipi hnen ah thlacambawm a dil cih a si.
Health Minister Dr. R.Lalthangliana va tongtu ah Justin Thang, Shin bia le S. Hu Lian tipawl an tel ti`n thuthang kan thei.
