Chin pacang Micak Rev. Khaw Ro Mang

Falam mizakip theihthlangpi Rev. Khaw Ro Mang (kum 75) cun February ni 25 ah a rianmi Pathian ṭanghlum ah in cawlhsan.

‘Mah tawk ih Khaw Ro Mang’ tiah ṭongṭhim hman ih kan rak hman ṭheu mi micak Rev. Khaw Ro Mang thuhla, Rev.Dr. Lal Tin Hre ih nganmi kan run tar sawng a si.

Rev. Khaw Ro Mang cu kut thawn rori hnahcang hrual parh theitu micak maktara a si

Kan rawngbawlpi, kan ngainat zet mi Rev. Khaw Ro Mang ih nun le hnațuan mi ihsi ka hminsin mipawl, ka thlahnak ah ka run nganlang ke aw!

1. Micak a si. Pu Mang ih hmin an sal vetei mi tampi thinlungih lang lohli cu micak a sinak a si. Kan Zahau le Sim ram huap sungah a vanglaiah a cak bik ding ti sehla, hlanlai bangih buanawk le sualawk vutvo a um lo ruangah kan tisual pang ke maw! Laitlang, Singai khaw kiangah “Khaw Ro Mang ih samcainak” an ti mi hmunrawnte a um.

A tha a zaa tuk ih, zawi huat ding khal si loin zanthing tuai tete a kut roriin a khiak, a bauhthlek ih, nupinu phur 10 ding tluk a sam thei ti a si. Ngalti an um laiah Savom sum sarih zik rori tal thei loin a karlakah a cehtar men. A țandan a fuh deuh lo ruangah hoha nei nanana cu a kut vawrhlam bese tuk loin a tuahmawh fangfang.

2. Tahan ih pastor an țuanlai, tui Prebyterian biakinn pi an sak laiah lettama mi 3-4 laiin tițuițo ih an zawn hnohno mi, pingkadu thing, pi 18, kaan cu a naupaw phahin (Saya Ma Pui a si hmang a pawk mi) lam hla nawn ah a va retsak. A hmutupawl in mak an ti tuk ih “an cekcek rero men” ti a si.

3. Falam țawng hmang Presbyterian Kawhhranpawl hrangah Pu Mang hi cawimawinak (credit) pek a phu tuk rori. Thiam hnai loin Lusei thu le hla rak hman a si ih, Mizoram Presbyterian Synod hnenah amah rori fehin an siannak a hung dil. Ke roriin Aizawl a thleng. Synod upapawl in thuhla an rak zingzawi ih, “Manga, ziang phunhnam saw na si?” an rak sut. Pu Mang cun, “Presbyterian ka si” a ti. Annih cu an mang a bang ih, “Zahau, Sim tivek nan um ih a ziangbik saw na si kan lo ti” an tisal. Pu Mang cun, “Cuvek lam hi ka buaipi lo, “beterian” ti lawng hi ka buaipi a ti. “A va beterian tak ve!” an rak ti.

“Awle, hung tlung phawt awla, kan run relkhawm ke cu” an ti. Pu Mang cun, “Ai, ka tlung lo ding, tu rori ah siannak kan lo pe, kan lo tuahsak ding” in ti ta uh, cu mi nan ti lai hlan lo ka tlung lo ding” a ti. Annih cun, “A tum hi a va ruh țhetțhet ve” ti phahin “Aw, na tivek in siseh” an ti hnu lawngah a rung tlung.

Amah cu hla thiam a si lo ruangah Rev. Lal Hngak le Rev. S. Hrang Kap Hnin (tleicia veve) in thiamzet le sak nuam tukin an let. Rev. Kap Dai Lo cu an cahnah hman ding le thil țul dang rak buaipi dingin țuanvo a pe. Falam țawngih hlabu kan neih hmaisabik a si. Cawimawinak ka lo hlan, Pu Mang!

4. A umnak Kawhhran, Presbyterian thisen a nei nasa. A inntek nu khal Kawhhran upa nemhngeb fanu a si vekin Presbyterian ah an hnget tlettlet, asinan Kawhhran dang siatnak a rel ciamco lo. Zohțhim a tlak nasa. A thisen cek ta sehla Presbyterian thisen group hman a rak si mai thei.

A fehliam hlanah inn ropi tak Pathian ih a pek mi, innthar lawmnak ding program a neih mi ah, “Minung 60 hrawng kan si ding ih Presbyterian pastor hlir in can nan hmang ding, nan daihawk lole Kawhhran dang cu kan pe leh men ke” in ti ih, Saya Ma Pui thawn kan zohaw rero.

5. Ziangvek harsatnak a tawn khalah “ka kut hi a thianghlim ding a si, thil thianghlim, Bawipai Zanriah Sakramen timtuahnak ah ka rak hmang zo” a ti ringring. A kut cu thil bawrhlawh thamnak dingah a siang lo hrimhrim, zohțhim a va tlak ve!

6. A duhthusam: A aw a feng nawn lo tiangih a rel țențo mi cu Falam țawng hmang, Kawhhran zaten hlabu pakhat, thluk bangaw, cafang bangaw hmang thei sehla ti a si. A rak buaipi zo mi Khristian hlabu sungih sak dah lo mipawl hnawl in, santhar hla, belhciandawl deuhpawl thun sehla, solfa thawn kan tuah ding ti a si.

Milai tungso ih feh nanana le kan leinun cem ding Pathian leirel a si ruangah in liamsan miarmo thotho, ka ui tuk, a pamhmai tuk. Rawngbawltu rinum le Kawhhran ngaina, rak feh sung ko.law, ziang kan tițha.