VP2 Pu Henry Van Ṭhio ih Chin mi hrang Hnaṭuanmi by JP Biak Tin Sang

May 12 ah Chin miphun ih rinsan zetmi VP2 Pu Henry Van Ṭhio thawn nazi 1 sung hrawng phone in kan biakawk. In sim mi pawl ka ruat tikah ka mang a bang. Chin mi hrang ih hna a ṭuan ṭhat zia le rinsantlak pacangṭha a si zia ka hmu suak.

2015 hrilawknak ah Amyotha hluatdaw in MP kan rak cuh. A nih hi NLD in a cuh ih kei in CNDP in ka cuh. A nih hi NLD a si ngai maw ngailo cu ka thei ciah lo. NLD nih an fial ruangah khal a si men thei. Kei khal CNDP lutmi cu ka si lo. Anmah nih in fial/hnek ruangah CNDP lam in ka cuh nak a si. Ka neh ding khal ka zum awzet.

TBC zingkhawm ṭheh ah thu tawite an sim ter. Ka thinlung ten kei mah aiin thusim a thiamlo a si hi ka ti rero. Chin ram ah thil suak a um lo. Zupalang lawng, kawl lam ih kuatkir salding cu a um ringring. Kan ṭhangso lotuk hi khuaruah har za a si tiih a simmi cu ka hna a tlak zet. MP ka tling a si ahcun Chin miphun ṭhangsonakding, fimzirnak lam hrang khal ka tawlrel ding. Chin ram ṭhansoding ka duh ruangah MP ka cuhnak a si tiin fiangten a sim. Kei khalin cangthei tawkin Chin mipi hrang ih ṭuan ka duh mi pawl ka sim ve. Cumi thusimnak ih a suak mi cu zovek kan tling khal a si le Chin mipi hrangah ṭuan ding tihi a si.

Mipi awaan suakmi vun zoh ahcun hrilawnak thlakhat duh hrawng tiang cu kei mah ka cak. Media hrekkhat in mipi hnen ih an sutnak khalah zaṭek tamnawn in ka tling sawn.

Hrilawknak a vun thleng taktak cun NLD in minung zoh loin party sawn kha zoh uh tiin a aupi ih Chin ram lawng ah siloin kawlram pumpi ah NLD in nehnak a co. Cuticun Pu Henry Van Ṭhio cun MP cuh pi pawl cu lakding umloin a rak neh neknek hai.

Hrilawknak ih a tling hnuin tuni tiang a hrang ih thlacamsaktu riangri ah ka cang. VP2 dinhmun ih hna a ṭuan thei zia le a ṭuan mi tete ka hmuh mi le a ṭuan mi pawl in sim bet tikah upat tlak a si zia le tluk ding rual a si lo zia ka hmusuak.

A hnaṭuanmi hrekkhat cu..
1.Hakha hrang ah tidai a tawlrel..
(Himi hi ka khawruah i harter zetmi a si. ka ruahnak khalin a ban lo. Hakha ih ṭulbikmi tidai a ngaihtuah. Zohman ih tuahtheilo dingmi tiih ka ruat mi a si nan a rak tuah thei riar.)

2.Yangon ih Chin miphun hrang hnaṭuantu All Chin Society hrang ah hmunṭha tukmi Edah 4 zikte in tawlrel sak. paisa Ting zawng ih sim ding a si ahcun Ting tamtuk a si. Siarcawk a si lo)

3.Chin ramkulh khua tamzet cu Myo a ngahter.

4.Chin ramkulh ih umdah lomi University, Hakha ah in tuahsak.

5.Thlanglei Laitlang Mindat khua ah University tuah ve dingin a tawlrel. Aṭuanter thok zo.

6.Falam peng Surbung vanzam tualrawn cangsuakthei dingin a tawlrel. Amah tawlrelpi hlah sehla a um suak lo ding.

7.Lailenpi ih Vanzam tualrawn hrangding khalah Cozah lam ah a rak nawr nasa ve.

8.Paletwa – Sami – Matupi lamziinpi phahṭha dingin Pi Suh Kyi le ralkap thuneitu a sim ih ṭuan dingin lungkim a si zo.

Cupawl cu sihrih sehla pehvivo a si leh ding.

Pu JP Biak Tin Sang

Leave a Reply

Your email address will not be published. Required fields are marked *