Falam peng, Tlangzar kiang ah Miruak pakhat sar bet

Mizan, May 5, Tlangzar doawknak an cawl hnu ihsin hmuh a si nawn lo mi CNA ralap Salai Biak Hlei Sang cu May 6 ah a ruak an sar ti`n thuthang kan thei.

Ramsung hrambun media ṭhenkhat tarlang dan ah Tlangzar kiang ih ralhraang le Chin ralkap pawl an do aw hnu, zaan thim khalah riahbuuk ah a kir nawn lo ti a si ih, tuizing May 6 ah thi cia in a ruak an sar ti a si.

Hakha ihsin Falam lam pantu ralhraang SAC ralkap le Chin ralkap pawl cu May 5 ah Tlangzar kiangah nasaten an doaw ih, tuizing ih miruak an sar mi thawn Chin ralkap 10 pawl in ram le miphun hrang nunnak an hlan tiah theih a si.

Doawknak ih Chin ralkap nunnak liam pawl hi ruak lak thei mi le ralhraang kut ih tang hrih mi an um ih, miruak ṭhenkhat cu Khua lam ah an tlunpi zo.

Ralhraang thuthang cipciar pholang ṭheutu media pakhat tarlang dan ah nunnak liam Chin ralkap 5 pawl le meithal ralthuam ṭhenkhat cu SAC ralkap kut ah a um ti a si ih, ralthuam lak sak mi le thi-hnai khatmi miruak pawl zuk cu internet cahmai ah an theh darh ih “SAC ralkap lam ah mithi an um lo” ti`n an tarlang.

Chin ram media ṭhenkhat cun ni 4 doawknak ah ralhraang ralkap 20 hrawng an thi tiah an tarlang ve thung.

Tlangzar doawknak ah Chinralkap CNA, CDF le CNDF ralkap pawl an tel ih, atu ca kan ngan tiangah doawknak ih Chin ralkap thih thu cu CDF – Thantlang lawngin official in a phuang lai ih “Tlangzar doawknak ah CDF Thantlang ihsin mi 3 pawl in ram le miphun hrang nunnak an hlan” ti`n May 5 zaan ah Suunnak Capi an suah.

Leave a Reply

Your email address will not be published. Required fields are marked *