Thok Saal Dingin A Tlai Tuk Zo Maw?

Milai na si ruangah na nunlamtluan ah sunralnak tampi na tong men thei. Zokhal thil ziangkim ah kan famkim thluh lo. A sambau thei lomi hlawhtlinnak nunlamtluan ah zohman kan feh lo. A caan ahcun na hmuitin a pit thei, na thu ṭhencatmi a palh thei, na timlamnak a tlasam thei ih sunralnak in na cem thei.

Asinain tlaksiatnak in mi hlawhsam ah a lo tuah lo. Na bei a dong hlan sung cu na hlawhsam dah hrih lo. Raldonak ih na sun ruangah raldo na hlawhsam tinak a si lo. Hmat ngah ding zat na ngah hrih lomi kha leknak na hlawhsam tinak a si lo. Na zuam thei hrih lai. Thomas Edison kha meitlet sersuah thei dingin Element dik ngah theinak ding hrangah vei thawngkhat lai a tlasia. “Ka hlawhsam hrih lo. A cang thei lonak vei thawngkhat ka hmusuak tinak a si,” ti’n a ruat sawn.

Na tlaksiatnak kha hlawhsam ah ruat aw hlah. Cu hnakin fimzirnak ah ruat sawn aw. Nangmah le nangmah kha himi hmuhtonnak in ziangmi ka zirsuak timi sut aw hnik aw. Thufim sung ah hlawhsam thuhla a nganmi hrekkhat kan zoh pei. Thufim zate in a tican theinak ding hrangah siar aw tiah ruahnak ka lo pe duh.

Hlawhsam in kan ruah awnak san cu
1. Kan timtuah cia lo
Mifimvar cun harsatnak a rami an hmu ih an kian thei; Ziang a ruat cuca lo pawl cun harsatnak an pan ih neh hnu ah an sirawsal theu. (Thufim 27:12)

2. Ka tlasam thei lo tiah kan ruah awk lai ah
Zokhal tangdornak a neih hlan lo cu upatank pek a si dah lo; Mi hngal pawl cu siatnak lamzin ah an um. (Thufim 18:12)

3. Thaap kan ngam lo caan ah
Midang ih an lo ruahdan poisa tuk ih um khi tihnungza a si; Asinan Bawipa na rinsan ahcun phan ding a um lo. (Thufim 29:25)

4. Tuan deuh in dung kan siip tikah
Mi zaangzel cun thil tampi a duh zet theu. Asinan zianghman a ngah cuang lo. Hnatuan zet mi cun a duhmi pohpoh a ngah theu. (Thufim 13:4)

5. Pathian hmuhsaknak kan cohlang lo tikah
Mi hrek in lamzin dik tiih an ruahmi a netnak ah thihnak ih mi hruaitu lamzin a um. (Thufim 14:12)

Na ruahsan vekin thil a cangsuak lo tikah zuamcawhnak ka tong ti mai aw. Mawhthluknak, phuanhlamnak lole puhnak tuah hnakin na hmuhtonmi in ziang ka zirsuak ngah ding timi hawl sawn awla a thar in thok aw. Mah le mah zaangfah awknak sangka khar aw. Na hmailam caan ah t’hum aw awla Pathian hmuhsaknak thlun aw. Pathian in kan palhnak tumpi sung ihsin kan hrangah a t’ha bik in hruai thei.

Dunglam ah kir in a thar kan thok saal thei lo. Asinain tuni ah a thar kan thok thei ih thil thar kan tuah thei. Tho awla zuamnak t’hehsuak aw. Thok saal dingin a tlai tuk zo maw? Tlai lamlam lo.

Cangantu – Salai Thawngpi/Ramthlo

Leave a Reply

Your email address will not be published. Required fields are marked *