Thlanmual Thar Rem Ṭul Khawpin Falam Dinhmun Ṭumsuk Lam A Pan

Atufang Falam covid boruak cu deem lam pan thei loin thlahrek sungah nitin deuh thaw in mithi an um.

Covid – 19 ruangih mithi an tam vivo ruangah Cinmual thlaan hlun ah hmunhma a um nawn lo ruangah Lailun fehnak ziin thlangah thlanmual thar tuah a si na`n lamziin ṭhat lo ruangih hmang thei hrih lomi cu July 2 ah veng ṭuanvo neitu pawl in an rem a si.

COVID-19 ruangih mithi tam vivo ruangah ruak vuinak pawl bahlah lo dingin țuanvo neitu pawl in an zuam rero ih CRCDF khal in Cinmual thlanmual fehnak lamzin rem dingah sumpai an bawm ve. Cuih sumpai pawl cu ram sung/leeng hmun tinkim ihsin Falam COVID nat dokhamnak hrangah mipi ih thawhkhawmmi a si.

Cinmual thlanmual thar cu acres 7 lenglo kaumi a siih thlaan tuah cia 14 khal a um ruangah thihhloh tongtu pawl cun olsam te’n hmang cih thei dingah timlammi a si.

July 2 : Falam ah Covid 19 Mithi Vuiliam

Canbari tlawng saya Hung Hleih (kum 46) in July 2 zinglam nazi 4 hrawngah in cem san tiah theih a si.

Amah hi Kanaan Baptist Church ih kawhhran upa (deacon) ṭuan rero lai a siih Falam siizungpi ah in cem san hnu, zinglam nazi 8 hrawngah volunteer pawl le KBC kawhhran țuanvo nei pawl in Canbari thlanmual an vuiliam a si.

Tuini, July 2 ah Falam Siizungpi OPD ih COVID-19 Nat check mi 38 sungah mi 17 in Nat an nei ih May 20, 2021 ihsin July 2, 2021 tiang mipum 827 an check ih mipum 290 an positive mi lakin mithi 16 an um zo a si.

COVID-19 ruangih Falam peng sungah a thimi pawl cu:
June 2 ah Pi Zing Rem Thluai (Kum 53), June 12 ah Rev. Piang Bik (Ramthlo- Kum 51) le Pi Khawfeli (Rihkhawdar- Kum 81), June 13 ah Pu Sui Ceu (Kum 67) le Pu Lalthanpuia (Rihkhawdar- kum 38), June 16 ah Mai Lal Muan Kim (Kum 27), June 18 ah Pi Za Nawn Kai (Kum 79), June 19 ah Pastor Thang Hre Mang (kum 33), June 21 ah Pi Lun Khaw Niang (kum 76), June 22 ah Salai Lal Than Eng (kum 25), June 24 ah Pu Cung Lian (kum 66), June 25 ah Pu John Ral Za Lian Kulh (kum 60), June 26 ah U Win Naing (Rihkhawdar- kum 72), June 27 ah Pu Hrang Thawm Vel (kum 62), June 28 ah Pu Leeng Tin Hre (kum 66), June 29 ah Daw Win Mya Kyi (kum 51), June 30 ah Pi Ni Siang Men (kum 39), July 1 ah Pi San Del (kum 63) le Pu Lal Duh Cung (kum 44), July 2 ah Pu Hung Hleih (kum 46) pawl an siih Falam khuasung ihsin mi 16, Laikhua lam ihsin mi 4 an thi zo ih zatekom mithi 20 an um thlang tiah theih a si. (CH dailynews)

Leave a Reply

Your email address will not be published. Required fields are marked *