Thla 8 kimzo nau pai lai Chinnu cu Covid nat in nunnak liam

Pulhpi ciilnuaituar Chikha khua ih um Chin nupinu pakhat cu May 30 zaanṭim ah Covid natnak in a nunnak a cem tiah kan thei.

Amah hi kum 38 mi a si ih thla 8 kimzo nau pai lai a si. May 30, zaan nazi 11 luan hrawngah an tuamhlawmnak Siizung ah nunnak cem in May 31 ah an vuiliam tiah ramsung media tarnak thawng in theih a si.

India ramri ih um Chin ramkulh, Tonzang peng, Cikha khua ah May 11 ihsin Covid mina hmuhsuahsal a siih voilekhat ah mina an pung zutzo.

Siizung umnak ding deihaw loin le tuamhlawmnak ding bungrua tiang deihawlo khawpin mina an pung ih ramsung ramleng tiang kutsangnak an nei phah.

May 11 ihsin tuni May 31 tiangah Cikha khua ah nemhnget Covid mina 50 kimzik an um ih tufangah Cikha siizung ih tuamhlawmmi mina 9 an um tiah Khonumthung thuthang in a tarlang.

Leave a Reply

Your email address will not be published. Required fields are marked *