Thla 6 mi nau pai lai raltlan Sui te in a hmuh ton mi a relsuak

Ṭio kan kaan zik ciah ah Myanmar palik pawl in, in dawi – Sui te (hminthleng)

Suite pasal cu palik bawi a siih kawlram ralkap ukhruainak dodal in an sungten India ram ah himnak hawl ih tlanlut an si.

Kum 5 mi fanu pakhat an nei ih an fanu khal an tlanpi. Cuihtlun ah Suite cu Thla 6 mi nau a pai lai. An tlan suak ah hnipuan malte lawng an keng ih paisa khal nihnih-thum deih fang lawng an keng remcang.

Ralkap le palik tong pang ding phang ah zaan ah an cangvai ih sun ahcun mi zawh dah lem lo mi ziin sia an zawh. Ralkap le palik hrial in peng sawmteel khual an tlawng hnu nithumnak ah India-Myanmar ramri an thleng.

“Ralkap le palik pawl in kan khua ah kan sungten in hawl ti`n kan thei. Ramri tiva kan kaan zik ciah ah Myanmar palik pawl in in ra dawi. Thinphang zetin ramri kan kaan suak thei ih hmun him ah kan thleng” tiah kum 36 mi Suite cun a sim.

“Ralkap an lal hnu in kan ram ah zalen zetin kan khawsa thei lo ih kan duh vek khalin thu kan rel ngam lo. Kan ram a ṭha sal ahcun tlung kan duh ko. Nan, tu dinhmun vek a si cun tlung ngaih nak a um lo” tiah Suite cun nau cawi phah in a sim.

Mizoram ih an umnak cu inn/khaan biite a siih itkhun khal a um lo. A um sun Cabuai fate pakhat par ah an thilri mal lai an ret. Culocu tidai bur, rockside le motor cycle lukhum lawng an nei. Ihphah khal a hran ten a um lo, zial par ah puan paate an phah ih a remcang mi lukham ah hmangin le puan zawnaw in an sungten an it. Thilri, bungrua neihmi khal an nei lo nan Suite cun Mizoram kan thleng veten ka thinlung ih ṭih nak a um mi hmuahhmuah a hlo thluh a ti.

“Neih mi cu kan nei lo. Asinan hih hmun kan thleng cu him zetin ka thei aw. Ka thinlung khal a zaangkhaai thluh. Cun, nau nei ding khalah Mizoram hi a him sawn. Asancu kawlram doctor tamsawn cu CDM ah an lut thluh” tiah Sui te cun a sim ih “Nan, India cozah le Kawl ralkap pawl ziangtin an be aw ding ti a ciang hrih lo ruangah thla 1-2 thil thu ah khawi kan thleng ding tikhal sim a theih lo” a ti.

India cozah hin Myanmar buainak thu ah atui March thla lai hrawng tiang ṭongsuakmi a nei hrih lo nan ramkhel thiamsang pawl cun ASEAN ram pawl Awaan a ngai ih ram tamsawn ih thuthlukmi a ṭawmpi ding tiah an zum.

Tuhrihtiangah a ramsung ih raltlan lut pawl cu India daan kalh a si ti`n a hmu hrih nan a lut zo pawl ziangtin a tuah tum tikhal a relsuak hrih lo. Asinan, Myanmar rampi a buai ih raltlan tamzet in India ram an pan tiih thuthang a suak veten ramri kil dingah ralkap phunphun a thlah a si.

Leave a Reply

Your email address will not be published. Required fields are marked *