Thirleng hman Hmu Dah Lo Kan Khua BOMBA ah Motor zin hmun 3 in a thleng zo

Kum 1958 hrawng Falam ka thlen pek ah, Thirleng ṭih in zin thlang ah ka rak tla dah. Culai ahcun kan khua ah Thirleng kan hmu dah lo.

Caan a rung her vivo ih kan khua ah motor zin hmun 3 in cozah bawmnak in a thleng tariai aw. Mangbangza.Manglam vek.
Kum 2016 ah Taal in Rulbu, Tiahdai, Bomba in Khawlung ah Jeep a thleng thei. Rulbu le Tiahdai karlak zin cu a suk so a tam tuk ih ṭih a nung deuh.

Kum 2020 ahcun Taal, Zamual, Lungtar, Bomba zin cek an thok. Kum 2020 thotho ah Khawlung, Zo Dihai, Bungzung, Uisii, Darteti in Khuanglung tiang Pi 21 kau zinpi an cek lala. Khawlung lam in kan khua tiang pi 21 kau zinpi June thla sungah an rak cek bet.

Cuticun Lungtar lam in kan khua Bomba tiang zin cek tu JCB le Khawlung lam in zin cek tu JCB cu June thla 18 ah kan ram Khuaihnok tlang kan timi ah an tong aw curco.

Cuiruangah Zamual in Khuanglung tiang pi 21 kau highway zinpi cu a tlang zo, a pop zo tinak a si. Bomba in Zamual tiang pi 21 kim ding in cek bet ding malte a tang lai ti a si.

Zamual in Khuanglung tiang hmun suk so a um tuk lo. A dam ziahziah, a phei zurzo. Zikzek timi a kel um tuk lo in a feh thei thlang ding ti a si.

Tiahdai in Bomba, Lungtar in Bomba, Khawlung in Bomba tin hmun 3 in kan khua ah motor a lut thei thlang tinak a si. Tlangkhua in Bomba ah Motor cycle in feh a theih hrih fawn.

Cuiruangah, tuihlan ahcun Bomba cu ralrelhnak ṭha an rak timi a si naan, tuahcun relhnak ṭha a si nawn lo.

Zinpi um ih tthatnak.
Pursum leilawn a ol thlang ding. Bomba in Rih, Tibual, Satawm, Leilet, Lairal tlangtluan ah. Khunglung Aikawn in Tlauhmun ah. Bomba in Falam, Hakha, Thantlang lam tiang..duhduh ih thil zuar a theih thlang ding.

Asiatnak
Lut le suak an tam ding ih, cumi sung ah siatnak phurtu khal an bo lo (an um) ding. Kan ttoruah a ttha tertu kan zoram tupi thing a him lo pang ding ti phan a um fawn. Cui kan zoram tupi thing pawl in, kan dawhhna a si mi Khawlung va le Hnahkhar va a tam ter. A por ter.A thianghlim ter. A fim ter.

Kan thingkung in kan kiangkap thli bal pawl (Carbondine oxite) a zuk ih thli thiang kan hawp ding mi (oxigin dat) a suah. Cutluk ih kan hrang ih ttha kan Tupi thing pawl hi kil him tengteng a ttul.

Sumpai ngah ding lawng a ruattu pawl in an hau kolh thluh pang ding timi phan a um zet. Aaluu cinnak vek men ah Lairam kan tupi tam tuk an hau kolh thluh zo. Nonawn fa pawl in taimak suah in kil him tengteng uh.!!!

Pu Thang Tin Sum
Yangon
June 21, 2020

Leave a Reply

Your email address will not be published. Required fields are marked *