Thantlang KhuaNu/Pa, Biaknaklam hruaitu le Ralhraang SAC cozah thu rel tlang

A sawprop zet zo mi Thantlang khuapi tung ding sal nak ding timi thulu thawn Thantlang Khawnu/pa le ralhraang SAC cozah cu June 30 ah Hakha khawlipi ah thu an rel tlang tiah theih a si.

Ralhraang SAC cozah in thureltlang dingin kut a hlan hmasa ih Thantlang Khwanu/pa le biaknaklam hruaitu ṭhenkhat thawn Hakha khawlipi ah hmaton thurelnak an nei.

Meeting ah Chin ram CM Pu Ngun San Aung in thucahnak a nei ih Thantlang khawpi tung ding sal nak hrangah Khawnu/pa, biaknaklam hruaitu le meeting kai SAC cozah ṭuanvonei zaten thin lung thiang ten thu ronaw a duh sak thu siseh, hmalaknak nei khawsuak thei dingin tuah ṭulmi tete relkhawm dingin le, Khawnu/pa biaknaklam hruaitu pawl khalin thinlung sungih thu um zaten relsuak thluh dingin forhfialnak a nei ih “Thantlang khawpi tung ding sal nak hrangah khat le khat rinawton a thupibik” a ti.

Cuhleiah raltlan pawl Hakha ah umter a duh thu siseh, aṭul cun sukso nakding mawṭaw tivek tiang tawlrelsak a si ding thu a rel bet.

Brigadier-General Myo Htut Hlaing khalin Thantlang raltlan pawl mah le umnak cio kir sal thei dingin le Khawpi tung ding sal nak hrangah Khawnu/pa le biaknaklam hruaitu pawl thawn kopaw in lotheihlo hmalaknak neih tengteng a tul ti`n thu a sim ve ih hnaṭuantlang dingin thu a tiam.

Thantlang Khawnu/pa le biaknaklam hruaitu khalin raltlan ko kir sal nak ding le khawpi tung ding sal nak hrangah ramkulh cozah le rampi cozah in a tuah ṭul tiih an ruah mi pawl cipciarin an sim ve.

Anetnak ah Thantlang khawpi ṭhansonak hrang ah tuah rero lai mi, tuah zo mi le tuah leh ding mi pawl ramkulh cozah ṭuanvonei pawl in an rel ve ih, Chin ram CM Pu Ngun San Aung in thu net relin meeting a khar tiah thieh a si.

Meeting thurel cipciar na siar duh le hinah hmet “Thantlang Khawnu/pa le Ralhraang cozah an tongaw”

Leave a Reply

Your email address will not be published. Required fields are marked *