Tedim le Hakha ah Covid 19 nathrik hawlnak Cet Hmang Thok

Chinram ih Covid 19 mina tambiknak Tedim le Hakha siizungpi ah Covid 19 nathrik hawlnak cet (Gene Xpert) ret thok a si thu theih a si.

Gene Xpert cet cu Hakha le Tedim ah September 9 in an ret thok ih Cet hmangthiamtu um bet a si le Ih-khun 100 nei mi siizung pawl ah retbet theih a si thu Chin State Minister for Social Affairs U ‌ Paung Lun Mint Thang in a sim.

Amah cun, “Gene Xpert cet cun veikhat zoh ah mi panga lawng a zoh thei ih a ṭuldan ih zirin hmundang khal ah rettheih a si. Tu ahcun Chinram ih Covid 19 mina tambiknak Tedim le Hakha lawng ah ret sung hrih a si.”

“Nathrik hawl ah veihnih zoh a si ṭheu. Veikhat cu mah le umnak cio ah zoh ṭha a siih veihnihnak cu Central pi ah kuat a si.”

“Tu dinhmun ah Covid 19 nat nei ding rinhlehmi an tam vivo ih centralpi khal a buai zet. Curuangah Chinram Ih-khun 100 um mi siizungpi pawl ah Gene Xpert cet ret thei sehla a ṭha zet. Nan, Cet hmangthiam an umlo ruangah a buai thlak zet” a ti.

Tu ah, Chinram ah Covid 19 mina 18 an um zo ih a tamsawn cu Tedim khua mi an si. Hivek dinhmun kan si ruangah Chinram cozah le Sii vaai thiamsang pawl in mipi hnen ah ralring cio dingin thu a than a si.

Chin World

Leave a Reply

Your email address will not be published. Required fields are marked *