Tedim khuapi ah Meithal puak thawm a thang, Mipakhat nunnak liam

Atufang Chinram boruak cu a sosang zetih Mindat kahdonak an cawlh hnu a nikhat nakah Tedim khua khal ah meithal puak thawn a thang tiah Tedim hrambun rintlak media ṭhenkhat in an tarlang.

May 16 zaan nazi 8 hrawngah meithal kah thawm a thang ti a si ih 2021/5/16, 21:02 nithla tikcucaan khenmi Lamziinkap ih mithiruak zuk cu Chinmi online khawvel ah a darh thluh.

Mithi hi zo a si ti cu tarlang a si lo nan Tedim myone sungih thimi a si thu le SAC ralkap kut tuar ih thi mi a si thu, Tedim hrambun media ṭhenkhat in an nemhnget.

April 27 khalah Tedim khuami tlangval Felix Thang Muan cu SAC ralkap in an kap that ih April 28 zaanlam hnu lawngah a sungte in a ruak an la thei.

Ni 20 sungah, tuizaan ih mithi thawn Tedim khuasung ah meithal thawn kah thatmi mipahnih an um zo ih mipi dinmi ralkapbu lam in zingtin hmalaknak an nei pehzomding ti cu theih a si hrih lo.

Meithal kah puak thuthawn pehpar in May 16, zaan lam hnu ah Falam neih lam, Chuncung khua kiang khalin meithal puak thawm a thang tiah khuami pawl in an sim.

Leave a Reply

Your email address will not be published. Required fields are marked *