Tedim ah Covid 19 mina 7 hmuhsuah a si +Tufang Tedim dinhmun

Kum 2021, January 6 ah Chin ramkulh, Tedim khua ih um mipasarih taksa par ah Covid 19 nat hmuhsuah a si thu IPRD Tedim in a tarlang.

An zaten အထက (၁) Facility Quarantine Center ih zohkhenmi Covid 19 rinhleh mina an si ih, SWAB an lak mi cu January 6 ah RDT cet thawn zohciangnak an nei tikah Covid 19 nathrik an hmusuak a si.

Hmuhsuahthar Covid 19 mina cu Lawibual (လွယ်ဘွာလ်း) veng ih um kum 65 mi mipa pakhat, Sakaw (စကောလမ်း) veng ih um kum 69 mi nunau pakhat, kum 39 mi nunau pakhat, kum 27 mi nunau pakhat, kum 65 mi mipa pakhat, kum 17 mi nunau pakhat le kum 6 luan mipa naute pakhat pawl an si.

Tedim cu saklam Laitlang khua pawl lakih Covid 19 mina hmuhsuah tambiknak hmun a si ih January 4 khal ah Myoma veng ih um thawsam ih thi mipakhat cu nat check nak an nei tikah Covid 19 nat a nei timi an hmusuak.

Amah cu thithlum, zunthlum nat nei kum 75 mi a si ih Harhdamzung lam ṭuanvonei pawl in a thih sun rori ah an phum cih a si. Mithi naivai ih um a sungkhat unau pawl khal SWAB laknak nei in Facility Quarantine ah zohkhen hrih dingin an khum cih a si.

Tudinhmun ah January 6 ih hmuhsuahthar mina 7 thawn Tedim Siizungpi ah Covid 19 mina 22 an um a si.

Leave a Reply

Your email address will not be published. Required fields are marked *