Tanky kholh tumtu Mizo unau 3 te cu vansiatthlak zetin thawsam in an thi

Tuini, August 27 ah Mizoram, Kolasib, Diakkawn veng ih tikhawlnak tanky khawlh tumtu unauthumte cu vansiatthalk zetin thawsam in an nunnak a cem tiah theih a si ih runsuak dingin Tanky sung ih ṭum vetu kum upalam mipakhat khal a nunnak a cem ve tiah theih a si.

Mizoram hi Ṭhal lai ah tikhawlnak tanky khawlh tlangpi a si ṭheu ih Albert Vanlalhriata (kum 40), Andrew Vanlalhruaia (kum 40) le William Lalduhawma (Kum 35) tei` unau thum khal an tanky khawlh dingin a sung ih an lut cu suak saal nawn lo in caan rei zet an um.

An hnaṭuantu Vai pakhat lawngin Tanky ih an lut lai a hmu ih caan reizet tiang suak saal ti an nei nawn lo ruangah innteekte hnen ah a va sim hai.

Innteekpabik Pu Siama cun venghnen pawl a sawm ih a fa le pawl runsuak dingin mikhat a vung ṭum nan a mah khal thaw sam in tanky sungah a talbuai ve cih.

Cutin, veng hnen dang thawn ṭangrual betin Tanky sungih nikhua theilo mi 4 cu an phorhsuak thei saal ih Siizung lam ah an tlanpi lohli nan Dr. pawl in an nunnak an runsuak thei nawn lo.

Vanduainak tongtu Albert Vanlalhriata (kum 40) le Andrew Vanlalhruaia (kum 40) hi phir an si ih innsang fanau thawn um an si. An nautabik William Lalduhawma (Kum 35) cu tlangval a si ih an unau 3 in cozah hnaṭuan (Tlawngsaya, Palik, Sericulture Extension Officer) an si.

Albert te unau 3 le an innhnenpa thih thu hi atufang mizoram ih thular pakhat a si ih an thih dan thu thawn pehpar in hmuh dan phunphun a suak.

Cumi ah Doctor ka si tiawatu Lalbiakkima cun “tuṭum vansiattongtu pawl ih thih dan hi India rampumhuap ah a thleng thei zet ih thiamsang pawl in zirzoinak an nei mi ih hmuhsuahmi ahcun Carbon dioxide ruangah thawsam in an thi ṭheumi a si tiah an sim. Mihring ih thamlonak a reimi Tidai tank ah organic material phunphun a suak.”

“Cumi le boruak ih rak um cia mi Oxygen an cawkaw tikah Carbon dioxide an ti suak. Carbon dioxide cu oxygen ai in a rit ruangah tanky taw lamah an khawl aw. Cutikah Tanky sung ih luttu pawl cu Oxygen hiip ding tlasam in an talbuai a si” a ti.

Curuangah Tanky kan khawlh ding cun a sungih tidai hlok dingin maw, bucket hmangin tidai phorhsuak hmasa seh la a ṭha. Cuhnu khal ah meifar (candel) vang sin in tanky sungih a alh fiah zet lawng ah a sung lut ding a him tinak a si. Curuangah Tanky kan thianfai ding tikah fimkhur zetin tuah zuam cio uh si tiah Lalbiakkima cun a ti.

Leave a Reply

Your email address will not be published. Required fields are marked *