Taingen le Hiangzing karlak ih miruak an sar mi cu Moses Kim Tuang a rak si
Hiangzing-Taingen karlak, peng ban 29, falaung 3 kiangkap ih an sar mi mithiruak cu Zomi phunhnam hrang thei tawk suah ih hnaṭuan rerotu Moses kim Tuang ih ruak a rak si.
April 18 ah ram vak pawl in rimsia an thei ih kiangkap naivai an zoh ciang tikah mawṭaw cycle le a siat zet zo mi miruak an hmu ih zo a si ti an thei lo ruangah innsang kimlo lole mihlo theitu an um cun pehtliahnak nei lohli dingin phone number tarlang in internet cahmai ah thu an than.
Cutin, Kalay ih um a sungte pawl in an ngehven ih Moses kim Tuang ruak cu an hlam ih Christian daan pangaiten Kalay ah an vuiliam zo tiah theih a si.
A ruak hmutu pawl cun cangsual pangin kham hrap ah a tlak siding an zum nan mithi tei` innsang le miṭhenkhat cun thah mi a siding tiah zumnak an nei.
Moses Kim Tuang a hloh thu ah “2021 kum cem lam ah kaih a tuar. December 1 ah in phone ih ka luat zo in ti. Zinglam nazi 10 hrawngah in phone ih a luat zo thu kan thei cu kan lungawi zet. Sun nazi 1 hrawngah Tedim ra thleng ding a si nan, thlen ti a nei lo. Phone thawn khal kan pehtlaih thei nawn lo. Mi nih an that siding kan zum” ti`n Moses Kim Tuang thlennakding hmun ih rak hngaktu Saya Hau nih a rak sim dah.
Moses Kim Tuang cu Zomi Political Coorrdination Committee sungtel a si ih, kan dung kum Kalay le Tedim karlak ih a hloh thu ah ZRA cun CJDC sungtel pawl mawh an puh deuh. Asinan CJDC sungtel hriamkai pawlkom ṭhenkhat cun a nih thawn pehparin a thuhla zianghman kan thei lo tiah an rel ve a si.
