Surbung Airport Thuhla Theih Ṭha by Steven R Sunthang

Surbung Airport tiin vanzam ṭumnak picang Chinram in kan neihthei hi lungawiza ngaingai a si. Hivek cangsuak thei dingin ruahnak, thazang, sumpai le mai` titheihmi ciar ih ṭan rak latu zate parah Pathian in thlawsuah lo vur hramseh.

Navigational Aids test le Flight procedures tests an ṭheh thlang ding. Cutin, a ṭhabik le remcangbik Flight Procedures (Approach, Landing, Take Off & Departure Procedures) hrilfelsal ding a si.

Cui` hnuah Pilot zate thlun dingmi proccedures (documentation) ca in an ngan/pungsuai a ṭul lai. Cuṭheh in International Civil Aviation Organisation (ICAO) ih pekmi Airport Code (zumnak ah VYFL a si men ding) le, IATA Code khal ngah ṭual lai a si. Visual Navigational Chart & Jeppesen Chart tivek pawl tla tuah ṭul tampi a umlai. (Lai ṭong ih kan neih lomi pawl Mirang ṭongfang ka telh hnuaihni ih in rak theithiam hram uh).

June 26 ni vanzam thawn an test laiih Windsock (Thlitahnak) ka rak hmuhmi vek asilen thil hrang a nazet 15nm/h (27.7km/h) tluk a si. Navigational Aids thawn pehpar awin, Surbung Airport ih bunmi cu VOR/DME (VHF Omni-directional Range & Distance Measuring Equipment) a si. Falam kiangkap ih mero pawl hi Cumulostratus (ft 2000 -ft) le Nimbostratus (ruahsurnak mero) an si tlangpi.

Airport leilung sanlam (Airfield elevation) len ft 6000 a si tikah, VOR/DME lawng thawn cun kum khat ah thla zianghmuah sung hman a theih ding timi a fiang hrih lo. Jeppesen in GPS chart in tuahsak thei sehla a ṭhasinsin ding. Duhthusam cun, Instrument Landing System (ILS) nei thei ding tiang kan zuam vivo a ṭul lai timite kan theihhngilh lo a ṭha ding.

Surbung Airport kan neihthei hi Falam ti-aw pawl uan-awknak ding si loin, Chinmi zate hrang ṭhathnemmi Chinram ṭhansonak ding le lungrualnak ding sawn si hramseh. Pengdang rualpi pawl an lungawi ka hmuh tikah ka lungawi sinsin.

Cumi party, cumi pumpak ih thiltithei ruangah tivekin FB le Social media ah canganmi hmuh ding a um ruri ih a poizet. Thungaite cun, Chinmi pawl ih thuneihnak le an neihmi sumsaw ih tuahmi si loin, miphundang hnenih dilcop ih neihmi a si ti tla politician ṭhenkhat le hmin ṭhat rak cuh duh pawl in theithiam in tlawmlakdan tla thiam hai sehla thilṭhazet a si ding.

December 2012 kum ih Thuthangca rak nganmi le mipakhat ih email in kuatmi ka run tar. Kan pa le san ihsin rak thok rero zomi a siih, tui` project tlamtlingnak cu NLD cozah kai hlan USPD sanlai CPP MP sanlai ihsin a si. Curualrual in NLD cozah ṭuanlai ih ṭhehmi khal a si. USPD, NLD,CPP le ziang Party hman ih rak tel lo Chin pacangṭha, Falam pacangṭha le kiangkap khawmi tampi ṭanrualnak/zuamnak, thlacamnak ih a ra cangsuahmi Pathian thlawsuah – Surbung Airport a si.

Steven R Sunthang
via
FMP Cazual
zuk – Piang photography

Leave a Reply

Your email address will not be published. Required fields are marked *