Surbung Airport cang suak thei ding ih ṭan rak la ve tu MP U Zung Hlei Thang ih awkam

Tuizing, October 27 ih vanzam ṭum nak hmun Falam, Surbung Airport thu thawn pehpar aw in MP U Zung Hlei Thang in mipi theih ṭul mi tete simthannak a nei ih Surbung Airport sak peh zom dingin Amyota Hluatdaw ih thu a rak bur thok dan, a hlawhsam thu, Chinram hmun dangdang khalah Aiport ceek nak hmun ram an hawl thu pawl a ngan a si.

Amah cun, “2011 ih Hluatdaw kan kai thok veten Surbung ih airport um ding in Amyota Hluatdaw ah thu ka bur. Ka rak hlawhsam. Cule tawkfang in vanzam lam vuanzi an run thleng. U Nyan Htun Aung in a run tuan.

Cun Thantlang MP Daw Za Tlem in Hakha thawn a nainak hmun ah Aiport tuah ding in Pyithuh Hluatdaw ah thu a thun ih Zinghmuh tlang lole Thantlang ram ah si ding in thu a bur.

Cutikah hmaisa ih ka rak tinak hmun Surbung le Daw Za Tlem ih tinak hmun pawl zoh ding in vanzam lam hnatuan pawl an hung so. Cu le veten Surbung hi Chin State ah hmun rembik a si zia Hakha thaw khalin a nai ih Thantlang thaw khalin a nai, cun Rih thaw khalin a nai, a hmun khalah a ṭha bik Mirang pawl hmanih tuah an rak tumnak hmun a si … ti in Amyota Hluatdaw ah thu a bur leh.

Cutikah vanzam lam vuanzi U Nyan Htun Aung in, “Kan hung zoh thluh ih Surbung ih tuah ding in kan nemhnget. Hluatdaw ihsin budget kan ngah le kan tuah ding” ti`n Hluatdaw ah thu tiamkamnak a run tuah.

Cun budget an run suai thok ih hluatdaw ah an run theh lut. Cutikah Chin MP hrekkhat in an dodal ruangah Pyithu Hluatdaw ih Transport lam Committee in an dodal. Kei khal ka tang ve. Thu a buai tuk ruangah budget malte lawng kan ngah.

Hluatdaw ah Acozah in thutiamkamnak a neih zo mi hi ti hlawhtlin ding a si zia rel in kum tin hi thu ka ti nung sal ringring. Amyota Hluatdaw Speaker cun Remdaihnaklam Committee tivek Committee dangdang kum tin himi thu cek fel ding in ṭuanvo a pe ih vanzam lam tuanvo nei tu pawl committee ah ko in kan rel tlang theu ih hi thu kan nung ter sal ringring.

Peng dang MP pawl le himi thu thawn a pehpar aw mi MP pawl dodal lo ding in ka dil nasa hai theu. Cuticun kum netabik ah Kyats ting thawng hra kan run ngah. NLD Acozah a rung si hnu cun kanmah Falam mi rori CM kan run nei ih ahleice in amai zuamnak in NLD Acozah in tuisun vekih vanzam rung tum durdo ding in a run tuahsuak. Ks billion 37 lai cem in NLD Acozah in a run tuah suak. Lungawi um nasa. A thupibik cu Pathian lamhruainak in a rung cangsuak. To God be the glory” ti`n a mai bulpak Facebook cahmai ah a ngan.

zuk: Piang@photography

Leave a Reply

Your email address will not be published. Required fields are marked *