Sansungdaih Democracy ni eng kan ram ah a eng thlang ding – Saya James Thang

1958 October 28 ah Wunkyikyuk U Nu cun Pyituh Hluatdaw ko in 1947 daan hrampi vekin Bogyokkyi Ne Win hnen ah Wunkyikyuk si nak le Cozah aana cu a ap. Bogyokkyi Ne Win khal cun a co hlang ih cumi ni ahcun Ram Kiltu Cozah (အိမ်စောင့်အစိုးရ) a din ih 1960 Election tiang Wunkyikyuk ṭuan in Rampi a kai hruai.

Bogyokkyi Ne Win in kum 1958-1960 Wunkyikyuk a ṭuan sung ah USA le China le Ramdangpawl thawn pehtlaih nak ṭhazet a tuah thei ih Rampi khal a ṭhangso zet. 1960 February 6 ni ah Bogyokkyi Ne Win cun a tiamkam vekin Election a tuah sak ih a nehtu Thantsin phah sah pah lah Party ( သန့်ရှင်းဖဆပလပါတီ) hnen ah Rampi thu neih nak cu a pe sal.

U Nu cun Wunkyikyuk a ngah sal ih 1962 February 24 ni ah A Myota Ngilakhaan ko in March 1 ni ah Federal thawn pehpar in thurelnak an nei. 1962 March 2 ni ah President U Man Win Maung, Wunkyikyuk U Nu le Wunkyi dang pawl cu Bogyokkyi Ne Win in a kai ih Aana a ting. ၁၉၆၃ July 4 ni ah Burma Socialist Programme Party “BSPP” (မြန်မာ့ဆိုရှယ်လစ်လမ်းစဉ်ပါတီ) a din ih a ngan tharmi 1974 daan hrampi vekin Party pakhat hmin in 1988 kum tiang a uk ih Kawlram cu leitlun Farahbik le Retheibik ram ah a cang tir.

Himi Ne Win Aanasin(dictator) pa in diklo zet le Democracy daan lo ih Aana a ting mi le Rampi a kai hruainak cu US Rampi cun theilovek in a um san hlei ah Southeast Asian ah Communism lut lo dingih khamtu ah a hmang ih a bom sawn. U Ne Win Cozah cu US ram thawn an pehtlaih aw ruang ah China cun Kawlram ih Communist pawl hriamhrei pek in ziangkim a bawm ve. 1962 ih Bogyokkyi Ne Win ih Aana ting cu Harsa tuklo in a hlawh tling.

U Ne Win ih BSPP party kaihruaimi Cozah duhlotu Tlawngtapawl Hohanak in 1988 August 8 (8.8.88) ni ah Kawlram hmuntin khawtin ah Sandahpiahnak a um thok. Cumi Sandahpiah nak ah Tlawngta, yokesin Lemcang thiam, hlasak thiam, Biaknak zate, Pastor le phungki , Sayawun, Palik le Lahwakah, Ralkap hlun, Lawyer le Cozah hnattuanpawl le Mipi pawl an zaten an tel kim ṭheh.

Sandahpiah Mipi pawlcu mah le Uniform ciar hrukin Lamzin an zawh ih Cozah an duhlonak an au pi. Mingaladon ih um Ralkap tamsawn tla cun Mipi an din pi ve. Cozah cun Ralkap hmang in Sandahpiah pawl meithal thawn Kap in siatbal ṭheh a tum nan a hlawhsam ruangah Mipi Sandahpiah cu dailo in a luar sinsin ih Rampi huap in Sandah an piah.

US Ralkap le UN Ralkap lut mai dingvek in thu a leng ih Mipi an phur sinsin. Mipi lam in Mipi Cozah din ding an dil ih Dr Maung Maung cu Cozah hruaitu ah an ret ih Sandahpiah cu mallai a reh deuh. Culai ah Thawngtlakpawl an suak ih Vengtin ah an vak. Mipi pawl cun Thawngtlak Misual lak in Mah le veng humhim nak ah Nam le hriamhrei an neihmi keng in an veng humhim ding ah sun zaan an duty.

North Okala Myone lam ah Misual an kai ngahmi cu a lu an tan tivek Misual silo khal misual ah put in an that tivekpawl Cozah lam News ah ngan in Cozah cun Mipi a dem. Khawsung Vengtin ah Misual mittha thleidang har tiang in Mipi lak ah buainak a suak.

Cuti ih Mipi buailaifang 1988 September 18 ni ah Ralkap cun Kawlram le Mipi ruun ding ah Aana ka ting ti ah a puang ih Vengtin khaw tin ah ralkap le MI (ထောက်လှမ်းရေး) thlah in Sandah piahtu pohpoh cu an kai, an hrem ih Mipi ṭih dingin a phunphun in an cangvai. Sandah piah ih a teltu Cozah hnaṭuan siseh ṭuanlo siseh nuam teten an kai vivo. A tthen cu kai hlanih rak tlan man tla an um. Cuticun Ralkap in 2011 March thla tiang kum 22 sung in Uk.

2021 February 1 ih Ralkap Aana ting daan cu 1962 ih Ralkap Aana tingdaan thawn a bang aw ih Rampi a Uk tum daan le a kaih hruai tum daan cu 1958 ih Ralkap pawl ih အိမ်စောင့်အစိုးရ uk daan le kaihruai daan thawn a bang aw ding a bang. Cuvek thotho in Sandahpiahpawl an cimit (နှိမ်နင်း/ဖြိုခွဲ) tum daan le thawngtlakpawl suah ih Mipi thinphang thlavai dingih an tuah daanpawl cu 1988 ih an tuah daan vek thotho a si hrih lai.

Curuangah Aana ting Ralkap pawl ih thiltuah daan pawl hi 1958,1962 le 1988 ih an rak tuahdah zomipawl thawn a bang aw deuh ttheh ih an tuah zomi thlirin an tuah lai dingmi a fiang ko ih ziangtin kan ralring ding ti ruat cia a ṭha.

Tu hnak in kan buai sinsin lai ding. Kanmah le kanmah Fimvar zet ih kan kilhim aw thiam a ttul vek in Ralkap pawl lungbuai ding tiangin hnaihnok ih sandahpiah rero khal a ṭul.

Mi hrekkhat cun Hriamhrei nei Ralkap cu Hriamhrei neilo Mipi nih a neh thei taktak lo ding ti ah beidong tum mai tla kan um men ding. Beidong ding hi a si hrimhrim lo. Ziang ah tile Ralkap lam ih an cangvai daan hi a tlun ih tarlang zo bangin tuihlan ih an cangvai kelte vek a si hrih lai ih Hriamhrei ttha an nei hman ah Idea tampi an neilo ti a fiang.

Mipi lam in Hriamhrei Meithal neilo khal sehla kan thluak, Thazang le Lungrualnakpawl hi hriamhrei ah hmang in a cemnet tiang kan ṭang ahcun kan neh hrimhrim ding. Turkey ram ah leitlun ih hriamhrei ttha nei Ralkap cun Cozah Aana a ting nan Mipi ṭangrual nih Aana an lak kir sal thei ih Cozah nih nehnak a co sal.

Kan theih dingmi cu 1962 le 1988 lai ah Internet a um hrih lo ih Ralkap pawl an duhtawk in an cangvai thei hlei ah USA le UN le ramdangpawl nih mipi lam ah napin an ṭangtuk lemlo ruangahkhal Ralkappawl nih Aana awlten an ting theinak a si.

2021 ahcu Internet le IT san a si ih Ralkappawl an duhduh in an cangvai thei nawnlo. Cu hlei ah Idea ṭhaṭha nei Mifim, Mithiam Mino tampi an um ih Rampum huap in thatho zetin an cangvai. Cupawl nih napin ṭan an lak hlei ah CDM cangvaihnak ah Cozah hnaṭuan tampi an tel zo.

USA, EU, UN le Leitlun ram tamsawn khal Mipi lam ah napin in an ṭang ih an bawm. Culawng silo in Kawlralkap Bawi pawlcu ICC (International Criminal Court) ah tazacuai an tong zo ruang ah R2P UN Ralkap a ṭul daan vekin lut thei a si ding.

A tikcu cu mal lai a rei men thei nan Mipi cun nehnak a co hrimhrim dingih Sansungdaih Democracy ni eng kan ram ah a eng thlang ding. Beidonglo in thlacamnak thawn zuam cio uh si.

Leave a Reply

Your email address will not be published. Required fields are marked *