SAC ralkap in Mindat khuapi lak suak + Video umsun

SAC ralkap le CDF Mindat kahdonak cu ralthaum hmanmi thlauawtuk ruangah mipi zawnruat in CDF Mindat lam in dung an siip sak tiah theih a si.

“Mindat khua ih um mipa tapiang cu CDM ih tel le tello tikhal umloin ralkap pawl in an hmu tapiang an kai thluh. Innsangka bal sakin mi innsung tiang an lut”.

“Ziinpi ih ratu ralkap pawl cu kan kham thei nan Helicopter hmangin voi 30 lenglo ralkap le ralthuam an kuat bet. ကျောက်ထု lam khalin catbang loin phukpi thawn in kap. Tatyin 273 ralkap khalin meithaltum le sniper tiang hmangin khuasung ah an lut ih mipi an kap.”

“Upa nauhak tiloin hliamtuar an um ih tuamhlawm awman caan khal a um lo. Sanpiah veng ih cozah inn khal an kap ngah ih mipi lam hliamtuar an um. Zinglam nazi 7 in zaanlam 3 luan tiang meithal phunphun thawn vengsung an kap” tiah Mipi dinmi Mindat khuatlang Ukhruainak pawlkom in an phuang.

SAC ralkap in kahcolh dingih kaphnih thutiammi an pahbal ruangah CDF – Mindat le SAC ralkap kahdocawlh thutiam cu May 12 in ṭhiatbal a si ih cuih ni in an kapaw thok hnu, May 13 ah Mindat khua cu bulpak ralkap ukhruainak “Martial Law” an phuang.

“Martial Law” phuan a si thuthawn pehpar in boruak thlirtu mipakhat cun “ṭumkhat Dohawknak ah CDF – Mindat in ralkap 30 lenglo an that thei ruangah cuvek dinhmun thlenglo dingin Mindat khua ah bulpak ralkap ukhruainak “Martial Law” an phuang mi a si.”

“Ralkap ukhruainak hnuai ih um cu kan si nan thufeh tluang thei dingin le ralthuam tum hmang thei dingin ziin sial nakah “Martial Law” an phuangmi a si” a ti.

Martial Law an phuang hnu May 14 in SAC ralkap cun Mindat khua hmunhma umdan thlir in vanpar in siseh leihnuai khalin nasaten cangvaihnak an nei ih ralkap tamzet an kuat bet hlei ah vanpar le lei lam in hmun 3 rorin Mindat an do a si.

Cutin, ralthuam phunphun thawn CDF – Mindat umhmun khuarnak le khuasung an kap tikah mipi tuarnattuk phangah CDF – Mindat in dung an siip sakmi a si.

“KIA, KNU ralkap picang pawl hman nikhat thil thu ah hivek thazang hmang in an do dah lo.”

“Lai meithal le cawplecilh ih meithal tuahmi kaitu mimal rori hivek thazang hmang ih an do cu a luar kai tuk. Tuizing May 15 lawng hman ah Helicopter voi 30 lenglo a ra ih a par khalin in kap.”

“Zinglam nazi 7 in zaanlam nazi 3 tiang khualeng, khuasung, mipi umnak tiang catbang loin an kap. Hliamtuar khal tuamhlawmman caan a um lo.”

“Kaihtuar mipi pawl cu SAC ralkap in ralkham ah an hmangin khuasung lam nor nakah an hmang. Mipa hmuhtapiang kaih an tum ih zoi` thih hman poisa loin khuasung ah meithal an kap” tiah Mindat Mipi Ukhruainak pawlkom pakhat in ca an suah.

Cuvek dinhmun a si ruangah mipi in tuarnatuk phangin Chinland Defense Force – Mindat in dung an siip sak mi a siih ralkap kutah camkhatsung Mindat khuapi umhman ningla a rei hlan ah CDF-Mindat in ka lasuak sal ding tiah mipi thu an tiam.

Leave a Reply

Your email address will not be published. Required fields are marked *