SAC ralkap in CDF-Mindat hnen ah Kahawknak cawl hrih dingin zangfah an dil

Mindat : Myanmar SAC ralbawi dilngennak thawng in Chinland Defense Force – Mindat le SAC ralkap kapawknak cu April 27 zaanlam ah a langten an cawl hrih.

CDF-Mindat le SAC ralkap cu April 24 in an kapaw thok ih tuhrih tiangah SAC ralkap lam mithi an tamsawn tiah ramsung media ṭhenkhat in an tarlang.

April 26 tiangah CDF-Mindat in SAC ralkap 15 hnakih mallo an that zo ih khua dang ta ralkap dang bawmtuding thlah bettu SAC ralkap thawn April 27 zinglam ah an kapaw thok sal.

SAC ralkap thathar 150 lai an kuat bet nan Mindat khuasung an luttlang theilo tiah thuthang a suak ih, Cutin SAC ralbawi in kahawknak cawl hrih an duh thu Mindat khuanu/pa hnen ah dilngennak a nei tiah ramsung rintlak media ṭhenkhat in an tarlang.

CDF-Mindat lam khalin kahawknak cawl hrih in ralkap hnen ah dilngenmi thu 3 an nei. Cumicu ..

1. Mindat khuasung ih umhmun khuartumtu khuadang ralkap hmuahhmuah kir ter sal ding.

2. Mipi lam kaihkhihmi hmuahhmuah thlah zalen thluh ding.

3. Mindat khuasung ih umhmun khuar ralkap hmuahhmuah tlan ter thluh ding” tiah CDF-Mindat cun dilngennak an nei.

SAC ralkap lam khalin khualeng ih um ralkap pawl khuasung ralkap buuk ih lutter dingin dilngennak an nei nan CDF-Mindat in an cohlang lo.

Tuhrihtiangah SAC ralkap lam cun kahawknak an cawl hrih ih reilote ah thu let nak an nei tum leh thu Mindat hrambun media ṭhenkhat in an tarlang.

Leave a Reply

Your email address will not be published. Required fields are marked *