SAC ralhraang le Mindat-CDF karlak Boruak Sosang sinsin

Mindat-CDF le SAC ralhraang cu July 21 zaanlam tiangah voi 2 an kapaw zo tiah theih a si ih SAC ralhraang in ralkap thazaangdang an kuat bet vivo ruangah kaphnih lakah boruak sosang sinsin thei dinhmun a si.

Tuizing, July 21 ih an kapaw thok dan thu thawn pehpar in “khatlam khatlam in biak remaw thei lo ruang bikah a si. Mindat-CDF dilmi le ralhraang ngen mi a milawlo ih thu a tluang thei lo. Ziangthubik ticu rel a theih lo nan tuhlan ih ralhraang mawṭaw 6 an urkaang ṭum ih ralthuam pawl kha CDF kut ah a um ti`n ralhraang pawl in an ruat tiah thu a um” ti`n Mindat mipi ukhruaibu ṭuanvonei pakhat in RFA hnen ah a sim.

July 20 zinglam in SAC ralhraang pawl cu Mindat-CDF hmunram Shwe Taung Tha lam ah an kaiso ih July 21 zinglam nazi 7 hrawngah Chin-Magwe ramri Shwedwin Too khua kiangah SAC ralhraang le Mindat-CDF an kapaw thok.

Zinglam kahdonak ah CDF lam in hriamtuar le mithi an um lo. Ralhraang lam ah cu hriamtuar, mithi khal an um nan mipum ziangzat an si ti cu theih a si lo.

Sun nazi 12 in zaanlam nazi 2 karlak hrawng khalah Mindat thawn peng 30 hrawng hlatnak hmun ah doawknak a suak saal tiah theih a si.

Voihnihnak kahdonak khalah Mindat-CDF lam ah mithi le hriamtuar an um lo tiah theih a si ih, ralhraang lam ah thi le hriam tuar an um nan thuhla felfai kan thei hrih lo tiah Mindat mipi ukhruaibu ṭuanvonei pakhat cun a ti.

Tu dinhmun ahcun kahdonak thawmvang a suak bet nawn lo nan zaanlam nazi 3 hrawngah ralhraang mawṭaw 15 hrawng cun Mindat lam a pan ruangah ziangtiklai khalah Doawknak a suak thei saal a si.

Leave a Reply

Your email address will not be published. Required fields are marked *