Sniper thawn Ralhraang SAC ralkap 100 hrawng kap that zotu paralṭha Chin ralkap

CDF – Mindat hruaitu Mr Naing Tam (tactical commander of southern division) cun sniper hmangin SAC ralhraang 100 hrawng ka kap that zo a ti.

Chindwin thawn interview an nei nakah a relmi a si ih “ralhraang 70 cu kan nemhnget fel. 30 hrawng cu doawknak hmunram remcanlonak ruangah kan nemhnget thei lo. Nan, fuh zetin ka kap ngah ciang. 100 hnakin ka kap that tam tla a si thei” tiah a rel.

Amahhi, hlan ihsin raldo thiam hran khal a si lo. Mandalay ah Siivailam phungsangtlawng a kai lawk ih remcanlonak ruangah a ṭheh suak lo. Australia ram ah civil engineering zir ding tumtahnak a nei nan sungpailam remcanlonak ruangah a feh suak lo. Rampi a buai hlan tiang tourism business lam tuahtu a si.

Dothlennak ih pum a peaw dan thu thawn pehparin “Chin political party thapezettu ka si ih, Gen Z tamzet vekin ralhraang uknak duhlotu ka si. Dothlengnak ih pum ka peaw naksan cu NLD tha ka pe ruangah si hran lo in ralhraang ih minuaineek ti tawp thei beisei in ka tel sawnmi a si. Mipi zate hrangah hmaihngal zetin ralhraang donakah ka telmi a si” a ti.

CDF a lut hnu in Tlangpar hriamkai pawl hnen ihsin raldo a zir thok ih, April 2021 ih ralhraang mawṭaw an siat sak ṭum, sniper an lak sak ngah hnuin hmunhla kah dan a zir thok cop a si.

Atu ah, amah kut tuarin ralhraang 100 hrawng an thi zo ih, cuvek ṭhiamṭhaim in hmailam tikcucaan khalah tamtawk that thei dingin kan zuam vivo ding a ti.

Leave a Reply

Your email address will not be published. Required fields are marked *