SAC ralhraang in Falam mipi thinlung Luah khat tum

“Kan ram siatsuahtu ralhraang NLD pawl kai thei` dingin le hremnak pek an si theinak dingah kan zaten kutzakai tlangin ṭuantlang cio uhsi” tiih tumtahnei canganmi cu Falam khuasung ah an theh darh.

Ca thehdarhmi ahcun “Tlangpar hriamkaibu ṭhenkhat cun riittheihsii thawn pursum an tuahnak kau thei sin dingin NUG in an hnen ih raldo zirtuding a kuatmi PDF mino pawl cu riittheihsii zongsang dingin an rak tuah” tiah an ngan.

Cuhleiah NUG, PDF le Tlangpar hriamkaibu pawl cu riittheihsii thawn pursum tuah tlangin Dothleng cangvaihnak ah an hmang tiah Dothlengnak hmaibalter dingin casuahmi ah an ngan tel ih “Kan ram hrang ih mi thupi kan mino pawl lamziin diklo ah an hruai” tiah an ngan.

Ca suahmi ahcun mino pawl lamzawhnak an nei lai zuk siseh, Dothlengnak ruangih kaihkhih tuar mino ṭhenkhat le riittheihsii kaihngahmi zuk tamzet an ben tel.

Kalaymyo khuasung ih Doawklai, meithal keng mino pawl zuk khal an tarlang ih “a hraang zawng ih cangvai dingin CRPH le NUG in suncaw eidingmi ah Lungthosii an polh sak. Lamzawhnak le riittheihsii an hmang kop” tiah an ngan.

Hitiih ca an theh darh nak san cu Dothlengnak par ih mipi lungput tidang an tum tiah ruah a si ih, tualsungum mipakhat cun “SAC ralkap in mipi thinlung luahkhat an tum. Asinan an ca suahmi cu mipi hrangah hnihsuakza a si” a ti.

Tumtah nei ih ca an theh darh mi ahcun “EAO ṭhenkhat le NUG in mino pawl riitsii zongsang dingih an tuah mi cu kan ram hmakhua hrangih thil ṭihnungbik a si” tiah an tarlang.

Leave a Reply

Your email address will not be published. Required fields are marked *