SAC ralhraang in Ṭaal khua ah thilri Kyat Ting 150 man Fir/Siat sak

Falam peng, Ṭaal khua ih inn 21 cu SAC ralhraang pawl in an boh ih thilri an fir mi le an siat sak mi cu kyat Ting 150 man hrawng a si.

SAC ralhraang pawl hi July 20 ah Ṭaal khua kiang ah an thleng nan kahdonak ruangah khuasung ah lut thei lo in an um lawk.

July 22 zinglam ah Ṭaal khua ah an lut ih khuasung inn 26 lakah inn 21 an boh ih thil an fir hlei ah ken har mi thi ṭha zate deuh thaw cu an siat sak thluh.

“TV , Phone , hni le puan ro thil, Siti, Fangfai tivek le ar 50 hrawng an fir hlei ah thawhhlawm retmi khal an la thluh” tiah khuami pakhat cun a sim.

Khuasung dawr pakhat an boh ih thil an lak mi hi kyat ting 15 man hrawng a si ih an fir mi le an siat ta mi hmuahhmuah cu kyat ting 150 man hrawng a si ding tiah a mah cun a sim bet hrih.

SAC ralhraang pawl Ṭaal khua an thleng lai ah khuami pawl cu an rak tlan ṭheh zo ih kaihkhihmi nei loin nazi 12 hrawngah khua an suah san saal.

Falam peng ih SAC ralhraang le CNDF doawknak ruangah Ṭaal, Tlangzar, Thlanrawn le Rialti khuami 800 hrawng cu hmunhim ah an beu ih, a tu ahcun khuami tamsawn cu mah le khua cio ah an kir saal zo tiah theih a si. (CNJ)

Leave a Reply

Your email address will not be published. Required fields are marked *