SAC ralhraang pawl Tlangzar khua an thleng zo, Kiangkap naivai ah Meithal thawm a thang

Tuini October 19, zaanlam nazi 4 hrawngah Hakha lam pan rerotu SAC ralhraang pawl cu Tlangzar khua ah an thleng zo tiah kan thei.

Kiangkap naivai Khuami pawl ih sim dan ah ralhraang pawl cu mawṭaw 20 hnakih mal lo thawn an si ih Tlangzar khua an lut phah ah Ramthlo khua lam hoih in Meithaltum voi 2 hnak ih mal lo an kap ti a si. Cuhleiah meithal puak thawmvang kan thei phahphah tiah an sim.

CNDF ih ṭuanvonei mipakhat khalin SAC ralhraang pawl Tlangzar khua an thleng zik thu, tubaite ah a Fb cahmai ah a tarlang zo.

Ralhraang pawl cun Falam-Hakha ziinpi tluan ah inn 20 luan an urkaang zo ih Tlangzar khua teh an urkaang pang pei maw tiah khuami pawl donhar in an um.

Tudinhmun ah Tlangzar khuami zate deuh thaw cu Inn le Lo suah san in a remrem nakah beunak hawl in an tlan tiah thuthang kan dong.

Leave a Reply

Your email address will not be published. Required fields are marked *