SAC Chairman Pu Ngun San Aung in Chin Phunpi Ni hman danding relsuak

Voi 73nak Chin Phunpi Ni cu mah le peng cio ah tuah dingin Chin ramkulh cozah in nemhngetnak a nei zo thu Chin SAC Chairman Pu Ngun San Aung in a sim.

February 17 ih Chin ramkulh cozah meeting thusuak vekin Voi 73nak Chin Phunpi Ni cu mah le pengkulh cio ah Social Distancing daan thlun in atambik minung 60 hrawng thawn tuah a si ding.

Chin SAC Chairman Pu Ngun San Aung cun “tuisun February 17 ah Chin ramkulh cozah sungtel (secretary) U Toe Win hohanak in meeting kan tuah. Chin Phunpi Ni hi nihnih-thum hrawng lawng a duh thlang. Caan a um nawn lo ruangah Chairperson (Thabapadi) thusimnak le lungawipinak cakuat (Memorandum) siarnak tivek lawng in caan kan hmang ding. Covid 19 boruak a si thawn Social Distancing daan thlun in atambik minung 60 hrawng lawng in mah le pengkulh cio ah tuah a si ding” tiah The Hakha Times hnen ah a sim.

Voi 73nak Chin Phunpi Ni cu rampi thuron Daw Aung San Suu Kyi telin Surbung Vanzam tualrawn Onpuai thawn tuahkop dingin relrem a rak si nan kawl ralkap in rampi cozah thuneihnak a la ruangah khuakhancia mi pawl cu a remcang thei sal lo.

Tu ah, Voi 73nak Chin Phunpi Ni cu pengkulh khat ah kyat ting 10 cozah bawmnak thawn mahle pengkulh cio ah tuah a si ding tiah theih a si.

Leave a Reply

Your email address will not be published. Required fields are marked *