Rev. Dr. Martin Luther King Jr. le Civil Disobedience – Henry Lairam Vapual

Rev. Dr. King hi US ram mi Christian pastor a si. Kum 1929 ih suak a si ih Systematic Theology le fimnak dangdang zirtu a si.

US ram ah midum mirang thleidan awknak (racial injustice) nasa zet a um lai ih thanglian mi a si. Namnuai le thleidan a tuartu pawl hrangah pumpek ih hnatuantu a si ih thlacam nun nei zet tu khal a si.

A nun sung dingthluk lairelnak (justice) a dinpi ringring tu a si ih Civil disobedience le non-violent movement hmang in US acozah ih thil dik lo a tuahmi pawl a dodaltu a si.

Bible le Christian thuzirhmi pawl a zum tuk ruangah civil disobedience hi a nun sung a fehpi. Nam nuai a tuartu mipi lam ah tang in le civil disobedience movement hmangin mipi kaihruaitu a si.

Civil disobedience le non-violent movement hrang a hantuanmi ruangah 1964 kum ah Nobel Peace Prize a rak ngah. Christian pastor pakhat men a si nan US rampi ih san thuanthu (history) thleng ter tu le a dik lomi daan pawl (unjust laws) thleng ter tu a si.

A thihnak hi kum 50 lenglo a si zonan US ram ah le leitlun ramkip ah tui ni tiang an upat zet le an sunloih zetmi a si. Amai sermon mi, a thusimmi le a canganmi pawl hi tui sun tiangah leitlun mi tampi in an siar rero lai ih tlawng le university tampi khal ah an zir rero lai a si.

Rev. Dr. King hi Bible zum hngettu, Christian thuzirhmi pawl zumhgnettu le civil-disobedience movement zum hngettu a si.

Kan Kawlram sungah biakinn siar cawk lo a um. Kan Kawlram sungah Bible tlawng siar cawk lo a um. Kan Kawlram sungah Christian institution siar cawk lo a um. Rev. Dr. King vek Christian le hruaitu teh pa ziat kan um pei?

Leave a Reply

Your email address will not be published. Required fields are marked *