Rev. Dr. Hre Kio in US cozah palai hnen ah Myanmar ralkap cozah hnukthlak theihdaan thuphumthum a rel

Atufang Myanmar rampi buainak thuthawn pehpar in Indiana Chin Community tawlrelmi US Senotor Todd Young thawn hmuhtonawnak ah rinsanmi Chin upa ṭhenkhat in kan ram dinhmun simrelnak an nei ih US cozahpi in Myanmar ralkap cozah par ih hmalaknak nei seh la a ṭha ding tiih ruah mi thu ṭhaṭha relsuaknak an nei.

Cumi ah Dr. Hre Kio ih thuburmi cun mipi lung a laak zet. Dr. Hre Kio cun ralkap uknak tawpter dingih hmanfung ṭhabik a timi thuphunthum a rel ih US cozahpi ih bomnak kan mamawh zia khal a rel tel cih.

Cupawlcu …

1. Myanmar mipi le cozah hnaṭuan pawl ih duhphorhnak hi hmual a nei zet. Abikin CDM hi a hmual a na cuang ih kan hrang ih ruahsannak tumbik kan neihsun khal a si.

Curuangah US cozah in Civil Disobedience Movement (CDM) cangvaihnak hi in ṭanpi ṭul. US ram um Kawlrammi nih pumpak in siseh pawlkom/biaknak lam khalin siseh theitawk suah ih kan bawm mi cun rei a awh thei nawnlo khal a si thei. Curuangah US cozah ih ṭanpinak kan mamawh, US cozah hrang ahcun $million cu ziang titham khal a si lo.

2. ASEAN rampi kom policy pakhat cu mah le ramsung cio buainak ah hrolhaw loding tihi a si. Asinan, a takahcun an rak hrolaw.

Curuangah ASEAN sungtel ram pawl hin ralkap cozah hi Myanmar rampi Ukhruaitu cozah dik dinhmun in pomlo dingah US cozah hin in nawr sak seh. Cule ralkap cozah a cangvai cuca thei lo dingih kan ram tungdingsalnak ding lamziin a ong ding.

3. Myanmar ralkap hman theih dingih tawlrelmi US/International paisa $5.7 billion hi an kut sungah lut theih lo dingin in kham sak ṭul.

President Biden in $1 billion hrawng cu a kham zo ti`n ka thei. Himi paisa hi Myanmar ralkap cozah kut sungih lut theilo dingin kham thluh theih sehla ralkap cozah cangvaihnak hi nasaten a khawng ban ding tiah ka zum” ti`n Rev. Dr. Hre Kio cun a sim.

Rev. Dr. Hre Kio cun “himi ruahnak 3 hi Senator Todd Young khalin thupi zetin in ruah
sak ka beisei ih US cozah hnen tiang khal in thlen sak ka beisei” a ti.

Leave a Reply

Your email address will not be published. Required fields are marked *